E dënuar si bashkëpunëtore e Epsteinit, Maxwelli refuzon t’u përgjigjet pyetjeve në Kongres
Ghislaine Maxwell, bashkëpunëtorja e dënuar e Jeffrey Epsteinit, refuzoi t’u përgjigjej pyetjeve nga Komiteti Mbikëqyrës i Dhomës së Përfaqësuesve të SHBA-së të hënën. Maxwell u paraqit virtualisht për një dëshmi me dyer të mbyllura nga burgu i Teksasit ku po vuan një dënim me 20 vjet burg për trafikim seksual.
Kryetari i Komitetit Mbikëqyrës të Dhomës së Përfaqësuesve, James Comer, tha se “siç pritej”, Maxwelli kërkoi Amendamentin e Pestë, që i jep të drejtën për të heshtur.
“Kjo është pa dyshim shumë zhgënjyese”, tha ai. “Kishim shumë pyetje për të bërë në lidhje me krimet që ajo dhe Epstein kryen, si dhe pyetje në lidhje me bashkëpunëtorët e mundshëm.” “Ne sinqerisht duam të arrijmë në të vërtetën për popullin amerikan dhe drejtësi për të mbijetuarit, kjo është ajo për të cilën bëhet fjalë në këtë hetim”, shtoi Comeri.
Amendamenti i Pestë i Kushtetutës së SHBA-së u jep amerikanëve të drejtën të shmangin vetë-inkriminimin duke refuzuar t’u përgjigjen pyetjeve ndërsa janë nën betim.
Në një postim më parë në rrjetet sociale, avokati i Maxwellit, David Oscar Markus, tha se Maxwelli ishte “e përgatitur të fliste plotësisht dhe sinqerisht nëse presidenti Trump do t’i jepte mëshirë”.
“Vetëm ajo mund të japë rrëfimin e plotë. Disave mund të mos u pëlqejë ato që dëgjojnë, por e vërteta ka rëndësi”, shkroi ai.
Në një letër të dërguar Komitetit Mbikëqyrës të Dhomës së Përfaqësuesve para paraqitjes së Maxwellit, një grup të mbijetuarish të Epsteinit i bënë thirrje të ishin skeptikë ndaj çdo informacioni të dhënë nga Maxwell. Ata e kritikuan atë për refuzimin e identifikimit të “shumë burrave të fuqishëm” të përfshirë në operacionin e trafikimit të Epsteinit dhe refuzimet e saj për të “bashkëpunuar plotësisht” me zbatimin e ligjit, duke thënë se çdo “trajtim i veçantë” ose “besueshmëri e dhënë dëshmisë së saj”, do të ishte katastrofike për të mbijetuarit.
Maxwell u dënua në vitin 2021 për rolin e saj në joshjen e vajzave të mitura që Epsteini, ish-të dashuri i saj, t’i shfrytëzonte. Epsteini vdiq në burg në vitin 2019. Ajo po kërkon falje nga Trumpi dhe është akuzuar se ka gënjyer zyrtarët federalë. /abcnews.al
