Zeka: Pandemia mund të sjellë investime amerikane në Kosovë

Zeka: Pandemia mund të sjellë investime amerikane në Kosovë

Ekonomia June 19, 2020 - 14:19

Oda Ekonomike Amerikane në Kosovë organizoi një konferencë virtuale me organizatën e biznesit “Greater Des Moines Partnership” në shtetin amerikan të Iowas, përmes së cilës anëtarët e Odës patën mundësinë të diskutojnë mbi mundësitë potenciale për bashkëpunim në mes të dy vendeve, si dhe mbi mënyrat sesi ky shtet është ballafaquar me pandeminë COVID-19 në aspektin ekonomik.

Arian Zeka, drejtor ekzekutiv i Odës Ekonomike Amerikane, shprehu kënaqësinë për vazhdimin e bashkëpunimit në mes Kosovës dhe Iowas si shtete simotra edhe në këtë kohë pandemie.

“Pandemia COVID-19 ka pasur një ndikim shumë negativ në ekonominë dhe në sektorin privat të vendit në përgjithësi, megjithatë kjo kohë mund edhe të krijojë mundësi të reja për investime amerikane ose të tjera të huaja nga ata investitorë që mund ta lënë Kinën dhe Azinë dhe të kërkojnë tregje që ofrojnë avantazhe të ngjashme”, tha Zeka.

Xhavit Gashi, këshilltari i jashtëm i Odës Amerikane, theksoi se lidhjet në mes të Kosovës dhe Iowas janë shumë të vlefshme, duke përmendur se Kosova mund të marrë një shembull të mirë nga shteti i Iowas, i cili ka menaxhuar në mënyrë të shkëlqyeshme situatën me COVID-19.

Jay Byers, kryeshef ekzekutiv në organizatën e biznesit “Greater Des Moines Partnership”, përderisa theksoi ashpërsinë e ndikimeve që COVID-19 ka pasur në ekonominë e SHBA-së dhe në zinxhirët e furnizimit, shtoi se kjo pandemi ka krijuar mundësi për reformim të ekonomisë.

“Pandemia ka vënë theks në trendë të rinj, duke u mbështetur në avancime teknologjike, siç janë ato për punësim të decentralizuar dhe punë nga distanca”, tha Byersi, duke shtuar më tej se së bashku me Konsullatën e Kosovës në Iowa kishin planifikuar një mision tregtar në Kosovë gjatë këtij viti, për të parë mundësitë për investime dhe bashkëpunim në mes të dy shteteve, derisa theksoi se janë në pritje të rikthimit në normalitet për ta zhvilluar të njëjtën.

Ryan Caroll, menaxher për tregti ndërkombëtare në “Greater Des Moines Partnership”, deklaroi se pandemia COVID-19 ka bërë që shkalla e papunësisë në SHBA të arrijë nivelet e saj më të larta, në një kohë kur pothuajse po arrihej punësim i plotë. Carolli theksoi se bizneset prodhuese në Iowa janë ballafaquar me probleme dhe ndërprerje të zinxhirëve të furnizimit që nga fillimi i shpërthimit të pandemisë në Kinë, duke shtuar se organizata “Greater Des Moines Partnership” ka zbatuar plane të ndryshme strategjike në ndihmë të bizneseve gjatë kësaj kohe.

Për më tepër, Carolli potencoi se theks i veçantë i është dhënë edhe sistemit arsimor, ku janë krijuar programe të ndryshme për mësim nga shtëpia. Sipas tij, kjo pandemi ka krijuar nevojë të theksuar për të investuar në procese virtuale dhe për të riorganizuar në përgjithësi proceset e punës.

Artan Duraku, udhëheqës i Misionit Konsullor të Republikës së Kosovës në Iowa, theksoi se idealisht ky muaj do të duhej të shënonte vizitën më të madhe të bizneseve të Iowas në Kosovë nga industri të llojllojshme, specifikisht nga bizneset që merren me energji të ripërtërishme, teknologji informative dhe kompanitë që mund të jenë të interesuara në industrinë kosovare të procesimit të drurit.

“Pandemia ka kufizuar mundësitë për investime, duke konsideruar se të gjitha bizneset anembanë botës po ballafaqohen me probleme, e megjithatë Kosova duhet të kërkojë mundësi nga ky ndryshim global”, tha Duraku.