Abdixhiku viziton fermerë në Suharekë: Duhet të eliminohet burokracia për grante dhe të ketë sigurime bujqësore

Kryetari i Lidhjes Demokratike të Kosovës, Lumir Abdixhiku ka vizituar sot një familje në Suharekë e cila merret me bujqësi.

Abdixhiku në një postim në Facebook shkruan se në planin e tyre kanë paraparë eliminim të burokracisë për grante, sigurime bujqësore për fermerë dhe dyfishim të mbështetjes financiare.

Postimi i plotë

Fermerë të palodhshëm, punëtorë të zellshëm, që nën nxehtësinë e ditëve të verës e freskive të mëngjeseve të hershme, krijojnë ushqimin tonë të përditshëm në secilën tavolinë

Familja Shala, në Suharekë, është e tillë. I vizitova ata. Bisedova me ta. Pashë se si të nëntë anëtarët e familjes punojnë tokën në përditshmërinë e tyre. Nga kjo punë fisnike, e ndershme e me plot dashuri, ata mbajnë veten, edukojnë fëmijët, ndërtojnë vendin. Dhe në këtë fisnikëri të tyre, njeriu gjen dhe motivin politik. Atë që të shtynë të jesh me ta, në çdo hall e sfidë që kanë.

I kuptova nevojat që kanë. Të infrastrukturës, të ujitjes e të teknologjisë. Ndihmesa të vogla nga shteti që u japin shtytje të madhe përpara. Në planin tonë kemi paraparë:

Eliminim të burokracisë për grante;

Sigurime bujqësore për fermerë;

Dyfishim të mbështetjes financiare.

Për bujqit e palodhshëm që formojnë rrënjët dhe vet identitetin e shoqërisë sonë: ne ju shohim, ju falënderojmë dhe jemi me ju. Do të bëjmë rrugën përpara së bashku me ju, në mënyrë që çdo farë e mbjellë të sjellë shpresë e zhvillim për ju e gjithë vendin.