Shala: Rënia e njësisë B2 në KEK po rrezikon sigurinë energjetike dhe rrit çmimet

Ferat Shala nga PDK-ja ka thënë se sot ka rënë njësi B2 në KEK dhe sipas tij mbi 250 MWh energji elektrike janë larguar nga sistemi pa asnjë paralajmërim.

“Kjo nuk është më një ngjarje e rastësishme, por pasojë e mirëmbajtjes së dobët, menaxhimit të dobët dhe mungesës së përgjegjësisë institucionale”, ka shkruar Shala në profilin e tij zyrtar në rrjetin social Facebook.

Ai ka shtuar se çmimet do të rriten.

“Çdo rënie e njësive krijon krizë në treg, aq më tepër kur kemi rënie të paplanifikuara, si kjo e sotmja, të cilat rrisin çmimet dhe u japin tregtarëve hapësirë të diktojnë kushtet, ndërsa qytetarët paguajnë pasojat. Institucionet heshtin, investimet nuk japin rezultat dhe siguria energjetike po dobësohet. Pa reforma serioze dhe llogaridhënie, krizat do të vazhdojnë dhe çmimet e energjisë elektrike për konsumatorët, padyshim, do të rriten”, ka theksuar Shala.