Policia arreston një person që kishte urdhërarrest ndërkombëtar

Policia e Kosovë nga Drejtoria për Hetimin e Trafikimit me Narkotik (DHTN), në bashkëpunim e koordinim me autoritetet policore të Republikës së Shqipërisë, kanë arrestuar një të dyshuar në një fshat në Ferizaj,

Sipas njoftimit të Policisë thuhet se hetuesit policorë nga DHTN-ja kanë arritur që sot rreth orës 17:55, të lokalizojnë vend-ndodhjen e të dyshuarit, i cili ishte në kërkim ndërkombëtar, raporton Zeri.info.

"I dyshuari G.Ç., (mashkull shtetas i Shqipërisë), në momentin e arrestimit ishte në shoqëri me dy femra shtetase të Shqipërisë dhe një mashkulli nga Kosova. Dyshohet se shtetasi i Kosovës, ka strehuar për një kohë në shtëpinë e tij në një fshat të Vitisë, të dyshuarin nga Shqipëria. Arrestimi është kryer në fshatin Dardani të Ferizajt dhe hetuesit e anti-drogës gjatë operacionit të arrestimit të të dyshuarit janë mbështetur nga njësi tjera të PK-së", thuhet në njoftimin e Policisë.

Po ashtu sipas njoftimit të PK-së bëhet e ditur se për arrestimin janë njoftuar organet e drejtësisë dhe me urdhër nga prokurori i Departamentit të Krimeve të Rënda-Ferizaj është kontrolluar shtëpia e të dyshuarit A.I., në një fshat të Vitisë.

"Gjatë kontrollit në shtëpi është gjetur dhe konfiskuar një AK-47 me 15 fishekë. Ndërsa lidhur me rastin është njoftuar edhe Njësia FAST-ILECU të cilët në koordinim me organet e drejtësisë, do të merren me procedura rreth rasteve kur kemi të bëjmë me arrestime të personave që janë në kërkim ndërkombëtar", thuhet në njoftim.

Policia e Kosovës do të vazhdojë aktivitetet në drejtim të sigurimit të një ambienti sa më të sigurt për qytetarët, arrestimin e personave të dyshuar dhe dërgimin e tyre para organeve të drejtësisë si dhe do të vazhdojë e të thellojë bashkëpunimin me policitë e shteteve mike, me theks të veçantë me Policinë e Shtetit. /Zëri