Arrestohet ish-zyrtari i gjendjes civile, regjistroi një shtetas turk në komunë pa i plotësuar kriteret

Një person është arrestuar nga policia më 23 prill pasi dyshohet se kur ishte në pozitën e zyrtarit të gjendjes civile në Ferizaj e kishte keqpërdorur autoritetin zyrtar.

Sipas njoftimit të Policisë thuhet sei dyshuari ka keqpërdorur detyrën zyrtare duke regjistruar një shtetas të huaj (turk) në sistemin elektronik të gjendjes civile në Komunën e Ferizajt, teksa i njëjti nuk i kishte plotësuar kriteret e fitimit të shtetësisë.

“Si rredhojë e këtyre veprimeve të njëjtit i ishte mundësuar që të pajiset me letërnjoftim të Republikës së Kosovës dhe pastaj edhe me patentë shofer.  Me datë 23.04.2024, është siguruar prezenca e të dyshuarit të lartcekur për intervistë në prezencë të avokatit mbrojtës, ku pas intervistës me aktvendim të prokurorit, i njëjti është ndaluar për 48 orë”.

“Ndërsa personi i dyshuar mashkull turk që dyshohet se ka konsumuar veprën penale “Legalizimi i përmbajtjes së rreme” tani është i ekstraduar në Turqi”, thuhet në njoftimin e Policisë. /Zëri