Detaje të reja rreth spiunes serbe, ajo ishte në lidhje edhe me një polic kroat
Mediumi kroat Dnevnik.hr zbulon se gruaja nga Mitrovica e Kosovës, e cila aktualisht ndodhet në paraburgim për spiunazh, nuk ishte vetëm në lidhje me pilotin ushtarak kroat – me të cilin u arrestua – por kishte pasur më herët një marrëdhënie edhe me një polic kroat dhe ka qenë në kontakte të vazhdueshme me një ish-gazetar.
Këto të dhëna përforcojnë dyshimet se ajo ishte pjesë e një rrjeti më të gjerë spiunazhi që punonte në interes të Listës Serbe dhe strukturave të afërta me shërbimet serbe të inteligjencës.
Sipas burimeve të Dnevnik.hr, gruaja – që kishte punuar edhe në një mision të Bashkimit Evropian në Kosovë dhe që prezantohej si gazetare – nuk vepronte e vetme. Ajo dyshohet të ketë qenë pjesë e një rrjeti të mirorganizuar informatorësh, që mblidhnin të dhëna të ndjeshme ushtarake, veçanërisht nga strukturat e NATO-s në rajon, dhe i transmetonin ato te qarqet politike dhe zyrtare në Serbi dhe Kosovë, përfshirë edhe drejtues të Listës Serbe.
Ajo dhe partneri i saj aktual, një pilot ushtarak kroat që kishte shërbyer në një mision në Kosovë, janë arrestuar dhe ndodhen në paraburgim për 30 ditë. Gjykata e Qarkut në Split ka sqaruar se paraburgimi është caktuar për të shmangur ndikimin në dëshmitarë dhe për shkak të rrezikut për arratisje – sidomos në rastin e gruas, e cila është shtetase e Serbisë.
Dyshohet se piloti i ka dhënë partnes informacione të ndjeshme mbi pozicionimin dhe aktivitetin e forcave të NATO-s në Kosovë, të cilat më pas janë përcjellë përmes kanaleve të padukshme drejt strukturave politike serbe. Kjo përfshin, sipas indicieve, lidhje të mundshme me zyrën e presidentit të Serbisë dhe drejtues të Listës Serbe në veri të Kosovës.
Rasti është shpallur sekret dhe hetimet po i udhëheq Prokuroria e Shtetit. Presidenti kroat Zoran Milanoviq ka dalë me një deklaratë të shkurtër ku shpreh mbështetje për institucionet hetimore dhe nënvizon se çdo ushtarak kroat duhet të veprojë me nder, në përputhje me ligjin dhe betimin e dhënë.
Ministra të tjerë të kabinetit kanë qenë të rezervuar në komentet e tyre, për shkak të ndjeshmërisë së rastit. Megjithatë, ministrja e Kulturës, Nina Obuljen Korzinek, deklaroi se “vetë fakti që rasti është zbuluar tregon se shërbimet po funksionojnë siç duhet”.
Eksperti ushtarak Ivica Mandiq vlerëson se nuk bëhet fjalë për një rast të izoluar, por për një strukturë të mirorganizuar.
“Nuk kemi të bëjmë me një grua të vetme që punon për një shërbim të huaj, por me një rrjet të tërë. Pasi të rindërtohet struktura e këtij rrjeti në Kosovë, priten edhe ndalime të tjera”.
Sipas tij, edhe shtetet e tjera anëtare të NATO-s pritet të fillojnë hetime të brendshme për të kuptuar nëse ka pasur cenim të sigurisë ushtarake ndërkombëtare.
