Del para Gjykatës punonjësja serbe e OSBE-së, e akuzuar për spiunazh

Në Gjykatën Themelore të Prishtinës ka nisur gjykimi fillestar ndaj Jelana Gjukanoviqit, e cila po akuzohet për spiunazh.

Gjukanoviqi akuzohet se deri më 28 shkurt të këtij viti, kur është arrestuar, ka siguruar dhe ka shpërndarë dokumente dhe informacione të ndjeshme për Agjencinë e Inteligjencës dhe Sigurisë të Republikës së Serbisë (BIA).

Ajo akuzohet se ka marrë udhëzime nga i dënuari për spiunazh Aleksandar Vlajiq.

Sipas provave të siguruara gjatë hetimeve, dyshohet se Gjukanoviqi ia ka transmetuar informacionet e siguruara zyrtarëve të lartë të BIA-s, përkatësisht R.G., përgjegjës i BIA-s për rajonin e Novi Pazarit dhe L.B.

Asaj më pas i është vazhduar masa e paraburgimit edhe për dy muaj të tjerë.

Më 2 mars 2025, Misioni i OSBE-së në Kosovë kishte konfirmuar se e dyshuara është anëtare e OSBE-së.

“Ne jemi në kontakt me përfaqësuesin e tyre ligjor dhe po monitorojmë nga afër mirëqenien e tyre në përputhje me detyrën tonë. Misioni është në kontakt si me institucionet përkatëse ashtu edhe me Sekretariatin e OSBE-së në Vjenë për të siguruar respektimin e procesit”, thuhej në reagimin e OSBE-së.