Kapet në hyrje të Shqipërisë kosovari në kërkim ndërkombëtar për krime në Norvegji

Një shtetas kosovar, i shpallur në kërkim ndërkombëtar nga autoritetet norvegjeze, është kapur nga shërbimet e Policisë Kufitare të Morinës në hyrje të Shqipërisë.

35-vjeçari J. K. akuzohet për “Vjedhje me dhunë” dhe “Plagosje” nga Gjykata Lokale Sor Rogaland në Norvegji.

Pas verifikimeve të kryera në bashkëpunim me INTERPOL Tiranën, ai u arrestua me qëllim ekstradimin në Norvegji.

“I shpallur në kërkim ndërkombëtar nga autoritetet norvegjeze, për vjedhje me dhunë dhe plagosje, kapet nga shërbimet e Policisë Kufitare, në hyrje të RSH-së, 35-vjeçari.
Si rezultat i kontrolleve dhe verifikimeve të imtësishme në hyrje/dalje, me objektiva goditjen e paligjshmërive në kufi, si dhe ndalimin e shtetasve të shpallur në kërkim, të cilët tentojnë të lëvizin ilegalisht për t’iu shmangur përgjegjësisë penale, shërbimet e Policisë Kufitare të Morinës, në bashkëpunim me shërbimet e DVP Kukës, kapën në hyrje të RSH-së dhe arrestuan me qëllim ekstradimin, shtetasin kosovar: J. K., 35 vjeç, banues në Kosovë.
Nga verifikimet e kryera dhe nga informacioni i shkëmbyer me INTERPOL Tiranën rezultoi se ky shtetas ishte shpallur në kërkim ndërkombëtar nga INTERPOL Oslo, pasi akuzohet nga Gjykata Lokale Sor Rogaland, për veprat penale ‘Vjedhje me dhunë’ dhe ‘Plagosje’.
INTERPOL Tirana dhe INTERPOL Oslo do të kryejnë procedurat për ekstradimin e 35-vjeçarit, në Norvegji”.