Parandalohet futja e sendeve të kundërligjshme në Dubravë
Shërbimi Korrektues i Kosovës ka bërë të ditur se në Qendrën Korrektuese të Dubravës është parandaluar një tentim për futjen e sendeve të kundërligjshme brenda Institucionit.
Ngjarja ka ndodhur gjatë një bastisjeje të zhvilluar sot në zonën sterile të qendrës, në bashkëpunim të ngushtë me institucionet e sigurisë dhe Njësinë për Intervenim të Shpejtë (NJIK).
Sipas njoftimit zyrtar, aksioni rezultoi i suksesshëm, ndërsa zyrtarët korrektues arritën të identifikonin dhe ndalonin tri pako që dyshohet se përmbanin substanca narkotike.
Përveç tyre, u gjetën edhe katër telefona celularë pa numra serikë – dy iPhone, një Samsung dhe një Viko – si dhe dy adapterë telefoni, të cilat dyshohej se synohej të kontrabandoheshin brenda institucionit.
“Shërbimi Korrektues i Kosovës njofton se sot, në Qendrën Korrektuese të Dubravës, gjatë një bastisjeje në zonën sterile është parandaluar futja e sendeve të kundërligjshme në Institucion.
Aksioni u zhvillua në bashkpunim me institucionet e sigurisë dhe NJIK-un, i cili rezultoi i suksesshëm në ndalimin e këtij tentimi.
Zyrtarët korrektues kanë identifikuan tri pako që përmbanin sasi të dyshuara narkotike, katër telefona celularë pa numra serikë, dy iPhone, një Samsung, një Viko, si dhe dy adapterë telefoni.
Për rastin është njoftuar edhe Policia, ku kanë sekuestruar materialet e gjetura, ndërsa Shërbimi Korrektues i Kosovës ka nisur hetimet përkatëse.
Shërbimi Korrektues i Kosovës mbetet i përkushtuar ndaj rritjes së sigurisë dhe parandalimit të kontrabandës brenda institucioneve korrektuese”, thuhet në njoftim.
