Trafik drejt Kosovës: Arrestohet në Tropojë i riu me drogë, tritol dhe municion [video]

Trafik drejt Kosovës: Arrestohet në Tropojë i riu me drogë, tritol dhe municion [video]

Kronika November 30, 2025 - 12:38

Në Tropojë është finalizuar operacioni policor i koduar “Varkëtari”, pasi një 29-vjeçar nga Puka kishte transportuar me varkë drogë, eksploziv dhe municion luftarak, me qëllim që ta trafikonte drejt Kosovës.

Sipas njoftimit të Policisë së Shtetit, janë u sekuestrua 1.2 kilogramë kanabis, 405 gram tritol, 51 kapsolla detonatore, 5 m fitil zjarrpërcjellës, municion luftarak, si dhe një sasi lekësh.

“Shërbimet e DVP Kukës, në bashkëpunim me shërbimet e Komisariatit të Policisë Tropojë dhe me mbështetjen e shërbimeve të Forcës së Posaçme “Shqiponja”, bazuar në informacionet e siguruara në rrugë operative se një shtetas do të transportonte drejt Kosovës një sasi lëndë narkotike dhe lëndë eksplozive, organizuan dhe finalizuan operacionin policor të koduar “Varkëtari”. Si rezultat i këtij operacioni u arrestua në flagrancë shtetasi L. P., 29 vjeç, banues në Pukë”, thuhet në njoftim.

29-vjeçari u kap në flagrancë nga shërbimet e Policisë, në fshatin Dushaj, duke lëvizur me automjetin tip “Volksëagen”, në të cilin kishte fshehur në brendësi të bagazhit lëndën narkotike, eksplozivin dhe municionin luftarak, të cilat dyshohet se i kishte transportuar me varkë nëpërmjet liqenit, nga fshati Apripë, Pukë, deri në Tropojë, ku kishte parkuar automjetin me qëllim shmangien e kontrollit të Policisë.

“Në bashkëpunim me Prokurorinë dhe me homologët e Kosovës vijon puna për zbardhjen dhe dokumentimin e plotë ligjor të këtij rasti, me qëllim identifikimin dhe kapjen e personit që do t’i blinte në Kosovë. Materialet procedurale i kaluan Prokurorisë, për veprime të mëtejshme”, tha Policia e Shtetit.