Bllokohet përkohësisht qarkullimi në një segment të rrugës nacionale Ferizaj–Prishtinë për shkak të vërshimeve

Qarkullimi i automjeteve është ndaluar përkohësisht në një segment të rrugës nacionale Ferizaj–Prishtinë, si pasojë e pranisë së madhe të ujit në rrugë.

Sipas njoftimit zyrtar nga Policia, bëhet fjalë për segmentin që kalon nëpër fshatin Llapnasellë, konkretisht nga rrethi i “Prishtina Mall” në drejtim të Prishtinës dhe nga rrethi i “Marigona” në drejtim të Ferizajt. Vendimi për bllokimin e plotë të qarkullimit është marrë në koordinim me zyrtarë të Ministrisë së Infrastrukturës dhe kompaninë përgjegjëse për mirëmbajtjen e rrugës, transmeton Zeri.info.

Autoritetet kanë bërë të ditur se qarkullimi i automjeteve do të devijohet dhe orientohet përmes autostradës, deri në përmirësimin e gjendjes në këtë segment rrugor.

Ky veprim, sipas institucioneve përgjegjëse, është ndërmarrë si masë e domosdoshme për garantimin e sigurisë së qytetarëve dhe parandalimin e rrezikut në trafik./Zëri