154 vjet nga lindja e atë Gjergj Fishtës, poetit kombëtar të shqiptarëve

Sot, më 23 tetor, u mbushën 154 vjet nga lindja e atë Gjergj Fishtës (1871–1940), një prej figurave më të ndritura të letërsisë dhe kulturës shqiptare. Lindi në fshatin Fishtë të Zadrimës dhe që herët u dallua si prift françeskan, poet, orator e intelektual me ndikim të madh në formimin e vetëdijes kombëtare.

Fishta u bë i njohur për veprën e tij monumentale “Lahuta e Malcís”, që përshkruan heroizmin dhe shpirtin luftarak të shqiptarëve. Me gjuhën e pasur dhe vargun e gjallë, ai ngriti në art historinë, zakonet dhe idealin e lirisë. Kjo epope mbetet një nga shtyllat e letërsisë shqipe dhe një testament shpirtëror i kombit.

Përveç krijimtarisë letrare, Fishta dha kontribut të madh në arsimin dhe politikën shqiptare. Ishte ndër nismëtarët e alfabetit të unifikuar në Kongresin e Manastirit (1908), deputet në parlament, themelues i revistës “Hylli i Dritës”, si dhe përfaqësues i Shqipërisë në Konferencën e Paqes në Paris (1919).

Pas Luftës së Dytë Botërore, vepra e tij u ndalua për dekada nga regjimi komunist, por pas viteve ’90 Fishta u rikthye në piedestalin që meriton si poet kombëtar, themelues i stilit epik modern në gjuhën shqipe.

Sot atë Gjergj Fishta kujtohet si zëri epik i shpirtit shqiptar, një figurë që i dha letërsisë gjuhën e fuqisë, krenarisë dhe përjetësisë. /kultplus