Mbahen homazhe në nderim të Rushit Ramabajës

Homazhet u zhvilluan në prani të familjarëve, miqve, bashkëpunëtorëve dhe përfaqësuesve të institucioneve e të komunitetit kulturor, të cilët nderuan figurën dhe kontributin e tij shumëvjeçar në fushën e letërsisë dhe gazetarisë.

Pas homazheve, aktualisht është duke u mbajtur mbledhja komemorative për Rushit Ramabajën.

Rushit Ramabaja kishte lindur më 20 nëntor të vitit 1948, në fshatin Marec të Prishtinës. Nga fillimvitet ’70, ai ndërtoi një karrierë prej gazetari në gazetën e përditshme “Rilindja”, për të cilën punoi si gazetar dhe redaktor i kulturës, nga viti 1972 deri më 2001. Në periudhën pas çlirimit të Kosovës, Rushit Ramabaja e vazhdoi karrierën e tij si gazetar në radiogazetari, duke punuar në Radio Kosova. Në vitin 2018, ai ishte laureuar me Çmimin “Azem Shkreli” për vepër jetësore, nga Ministria e e Kulturës, Rinisë dhe Sportit e Kosovës.

Vepra e tij letrare dhe publicistike përbëhet nga mbi 20 libra mes të cilëve romane, vëllime poetike dhe drama. Ndër to janë edhe këto vepra: “Mareci i Shpresës së Mirë dhe rrëfime të trishta për golgotën e kolonave të Gallapit në Grashticë, Makoc e Llukar”; “Kangjella e Damastionit”; “Një gomar në Parlament”; “Rrëmbimi i vajzës së këngës”; “Amazanat në prillin e pushtimeve”; “Shtëpia ku nuk vdiset (Rekuiem për Xheladin Hanën)”: romani “Gruaja e Jezusit”; vëllimi poetik në shqip dhe greqisht “Euridika në mollën e ndaluar” etj. Ndër mbi 20 veprat e tij, do të jetojë edhe “Pema e misterit” për të cilën kishte shkruar: “Jusuf Gërvallës dhe të gjithë shokëve të mi të ndjerë”. Disa e llogaritën këtë kryeveprën e tij e disa vetë jetën e tij.