Ky shtet ka refuzuar ligjin për vdekjen e asistuar për pacientët terminalë

Sllovenët votuan kundër ligjit që do t’u lejonte pacientëve terminalë të përfundonin jetën në mënyrë të asistuar, sipas rezultateve paraprake të publikuara të dielën. Rreth 53% e votuesve e kundërshtuan ligjin, ndërsa 46% e mbështetën atë. Për më tepër, votat kundër tejkaluan pragun e kërkuar prej 20% të 1.7 milion votuesve me të drejtë vote, duke e bërë rezultatin të vlefshëm. Pjesëmarrja arriti në afro 41%.

Aleš Primc, aktivisti konservator që udhëhoqi fushatën kundër vdekjes së asistuar, deklaroi se “ka fituar dhembshuria”, duke argumentuar se ligji ishte pjesë e një reforme të rrezikshme shëndetësore dhe sociale, raporton Euronews Health transmeton Gazeta Shneta.

Ligji ishte miratuar nga parlamenti në korrik, pasi një referendum këshillues vitin e kaluar e kishte mbështetur atë. Megjithatë, kundërshtarët mblodhën mbi 40,000 firma për të kërkuar një votim të ri. Rezultati i së dielës e pezullon ligjin ekzistues.

Mbështetësit e vdekjes së asistuar shprehën zhgënjim, por mbetën optimistë se një version i ri i ligjit do të rikthehet.

Kryeministri Robert Golob theksoi se çështja mbetet e hapur, duke e quajtur atë një temë të dinjitetit dhe të drejtave individuale, jo politike.

Ligji parashikonte që personat mendërisht të aftë, pa mundësi shërimi ose me dhimbje të padurueshme, mund të kërkonin vdekje të asistuar, duke marrë vetë medikamentin vdekjeprurës pas miratimit nga dy mjekë dhe një periudhe konsultimi. Ai nuk zbatohej për personat me sëmundje mendore.

Kundërshtarët — përfshirë grupe konservatore, disa mjekë dhe Kishën Katolike — argumentuan se ligji binte ndesh me kushtetutën dhe se shteti duhej të përmirësonte kujdesin paliativ.

Presidentja Nataša Pirc Musar nënvizoi rëndësinë e pjesëmarrjes qytetare në çështje të tilla. Disa vende të tjera të BE-së, si Austria, e kanë miratuar tashmë këtë lloj legjislacioni. /Gazeta Shneta