Vdekja e ish-boksierit shqiptar nga koronavirusi, vjen reagimi nga presidenti i Shqipërisë
Numri i viktimave nga koronavirusi ka shkuar në 21 në Shqipëri.
Siç raportojnë mediat shqiptare, ish-boksieri i njohur shqiptar, Skënder Kurti ka ndërruar jetë, shkruan Zëri.info.
Kurti ndërroi jetë disa minuta më parë, në moshën 61-vjeçare.
Ditë më parë, ai kishte kaluar në vdekje klinike.
61-vjeçari ishte kampion me Tiranën, teksa më pas u bë edhe trajner me grupmosha të reja.
Si i ri, ai konsiderohej si njëri prej boksierëve më të mirë në Shqipëri.
Lidhur me këtë lajm të hidhur ka reaguar edhe presidenti i Shqipërisë, Ilir Meta.
Me anë të një postimi në rrjetet sociale, Meta ka shkruar:
“Me hidhërim të thellë mësova lajmin tragjik të ndarjes nga jeta të boksieritë dhe trajnerit të shquar të Ekipit Kombëtarë, njërit prej ikonave të sportit kryeqytetas, Skënder Kurti!
I admiruar nga të gjithë brezat e sportdashësve për rezultatet e tij në ring dhe pasionin e jashtëzakonshëm për sportin e dorezave, Ner Kurti gëzonte respektin e të gjithëve, veçanërisht të tironasve të mrekullueshëm që aq shumë e donin dhe i donte!
Edhe në këto ditë të vështira i madhi Ner Kurti luftoi fort, si një kampion që nuk dorëzohet lehtë!
I shpreh ngushëllimet më të sinqerta familjes Kurti, të afërmve, bashkëpunëtorëve e miqve të shumtë, në veçanti qytetarëve të Tiranës e tifozave të ngjyrave bardhë e bluë për këtë humbje të pazëvendësueshme!
LAMTUMIRË KAMPION! ë“./Zëri.info