Sulmuesi nga Kosova: Nëse vazhdohet kështu, në Bjellorusi do të ndodhë ndonjë situatë dramatike

Sulmuesi kosovar, Azdren Llullaku shpreson që në Bjellorusi të fillojnë të shohin më me seriozitet situatën pas shpërthimit të koronavirusit.

Bjellorusia është ndër vendet e pakta ku jeta vazhdon normalisht, ndërkohë që sulmuesi i lindur në Istog, ka shpjeguar situatën në një lidhje direkte me Sky Sport në Itali.

“Këtu nuk flitet shumë për koronavirusin. Një ditë më parë luajtëm, sot ishim në stërvitje, një lojtar ka dalë pozitiv dhe kjo na shqetëson pak. Por është vendosur kështu dhe ne po përshtatemi”, ka thënë ai.

“Tifozët, me vetë iniciativën e tyre, kanë vendosur që të mos vijnë të shumtë në stadium. Sipas meje, kjo është diçka pozitive, njerëzit fillojnë të kuptojnë se sa serioze është situata, edhe pse ende njerëzit nuk duken kaq të shqetësuar. Uroj që të mos krijohet ndonjë situatë dramatike, por nëse vazhdojmë kështu, me siguri do të ndodhë”, shtoi ai.

“Unë e dua Italinë, më ka pritur në një moment të vështirë. Më ka rritur si njeri e futbollist, do t’i jem gjithmonë mirënjohës. Fjalët e kryeministrit shqiptar më bëjnë krenar, populli shqiptar ka një zemër të madhe, në momente vështirësie është e drejtë që të ndihmojmë të tjerët”, deklaroi Llullaku.

Insporti më herët kishte shkruar për arsyet se pse futbolli po vazhdon të luhet në Bjellorusi, përkundër se tashmë është pezulluar në gjithë Evropën.