FC Suhareka dhe FC Ferizaj sigurojnë promovimin në Superligë

FC Suhareka edhe matematikisht e ka siguruar promovimin në Superligën e Kosovës në futboll.

Vetëm një vit pas formimit si klub, ekipi nga Suhareka ka arritur të ngjitet në elitën e futbollit kosovar.

Suharekasit triumfuan 0:1 ndaj Drenicës, ndërsa humbja e Trepçës’89 nga Vëllaznimi ia mundësoi matematikisht promovimin, dy xhiro pa përfunduar kampionati.

Nga edicioni i ardhshëm qyteti i Suharekës do të përfaqësohe me dy skuadra në elitë: FC Ballkani dhe FC Suhareka.

Edhe FC Ferizaj e ka siguruar promovimin në Superligën e Kosovës në futboll.

Pas fitores bindëse 0:3 ndaj Flamurtarit, Ferizaj matematikisht e ka siguruar Superligën për edicionin e ardhshëm.

Sezonin e kaluar, Ferizaj kishte rënë nga elita dhe pas një viti arriti të rikthehet.

Në vendin e dytë është Prishtina e Re në grupin B të Ligës së Parë, e cila do të luajë në barazh.