“Marca”: Vedat Muriqi, “makthi” i Real Madridit

“Marca”: Vedat Muriqi, “makthi” i Real Madridit

Sport August 31, 2025 - 17:11

Vedat Muriqi po vazhdon të shkruajë historinë e tij kundër Real Madridit.

Sulmuesi i Kombëtares së Kosovës ka arritur të shënojë ndaj madrilenëve për katër vite me radhë: 2022, 2023, 2024 dhe 2025, duke u shndërruar në një emër të veçantë përballë gjigantit spanjoll.

Në përballjen e fundit në “Santiago Bernabeu”, ku Mallorca u mposht 2:1, ishte pikërisht Muriqi që hapi serinë e golave, duke realizuar golin e parë që Real Madridi i Xabi Alonso-s pësoi këtë sezon.

Ky ishte goli i tretë – e gjysmë – i tij kundër madrilenëve, pasi në shkurt të vitit 2023, një duel ajror i tij me Nachon u konsiderua si autogol, por në fakt kishte vulën e tij.

Prestigjiozja spanjolle “Marca” i ka kushtuar një artikull të veçantë sulmuesit nga Prizreni, duke e vlerësuar si një “makth të vazhdueshëm” për mbrojtësit madrilenë

“Sa herë që Vedat Muriqi përballet me Real Madridin, është një betejë gjigante me qendërmbrojtësit. Loja e tij e fuqishme ajrore është një sfidë e përhershme për çdo kundërshtar,” shkruan ‘Marca’.

“Marca” shton se përtej aftësive në goditjet standarde, Muriqi është shembull i punës së palodhur dhe vendosmërisë që duhet të ketë një sulmues i kësaj madhësie.

“Ai bën gjithçka që një qendërsulmues duhet të bëjë për t’ua vështirësuar jetën mbrojtësve. Për ta përballur atë është më e vështirë sesa një vizitë te dentisti,” theksohet në artikull.

Muriqi, i quajtur shpesh “pirati”, tashmë ka fituar respektin jo vetëm në La Liga, por edhe në mediat spanjolle, duke u kthyer në simbol të luftës dhe efikasitetit kundër një prej skuadrave më të mëdha në botë.