“Nuk duhet t’i zihet besë Serbisë”, Alban Meha e kujton horrorin e Beogradit dhe e përmend padrejtësinë që iu bë

Kombëtarja shqiptare ka pasur ndër vite futbollistë që kanë lënë gjurmë, e një nga ata është pikërisht Alban Meha, i cili gjithmonë do të mbahet mend për goditjet e tij nga distanca, ku edhe shënonte dy herë me kuqezinjtë.

Mesfushori nga Prekazi, në një intervistë për “Panorama Sport”, ka folur për të shkuarën e tij, Kombëtaren, Evropianin 2016, si edhe ndeshjen e ardhshme kundër Serbisë.

Ditët e sotme shumë lojtarë e mbyllin karrierën ne moshë me të re, ndërsa ju vazhdoni edhe pse 39 vjeç. Cili është sekreti i Mehës?

Sekreti është se unë edhe në shtëpinë time, bëj ushtrime edhe me ekipin e mbaj veten në gjendje të mirë gjithmonë. Nuk i kam ndalur kurrë ushtrimet, sepse e dua futbollin me zemër dhe ky është sekreti, të kesh dashuri për futbollin.

Cili është pengu që keni nga Kombëtarja?

Pengu më i madh që kam nga Kombëtarja, është mungesa në Evropian. E kisha ëndërr Evropianin e Francës, që të isha aty, por trajneri De Biazi më bëri padrejtësi atë kohë.

A mendon se mund të përsëriten skenat e 11 vjetëve më parë?

Serbisë nuk duhet që t’i besohet asnjëherë dhe besoj se futbollistët tonë, do ta kenë shumë të vështirë të luajnë atje. Gjithsesi, unë dua që t’u uroj shumë suksese dhe të na bëjnë krenarë me një fitore.