Probleme për Realin, lëndohen dy lojtarë

Real Madrid zhvilloi një paraqitje zhgënjyese në barazimin pa gola ndaj Rayo Vallecanos të dielën pasdite, gjë që ka ngritur shqetësime pasi erdhi menjëherë pas një performance tjetër të dobët kundër Liverpoolit në mesjavë.

Tani është mësuar se nga ndeshja në Vallecas kanë dalë edhe probleme të tjera ,kësaj radhe në lidhje me lëndimet, transmeton Express.

Në minutën e 83-të të ndeshjes, Fede Valverde u detyrua të zëvendësohej nga Xabi Alonso, pasi ndjeu dhimbje. Uruguajani e kishte përfunduar edhe ndeshjen ndaj Liverpoolit me shqetësime fizike, dhe sipas Diario AS, i njëjti problem ishte arsyeja e zëvendësimit të tij kundër Rayo-s, pasi dëmtimi nuk ishte shëruar plotësisht para se të futej në formacionin titullar në Vallecas.

Real Madrid do t’i nënshtrohet testeve mjekësore për Valverden në 24 orët e ardhshme për të përcaktuar shkallën e dëmtimit, i cili po e shqetëson në pjesën e pasme të kofshës dhe në aduktor. Megjithatë, meqë tani është pauza ndërkombëtare, ekziston optimizëm se ai nuk do të mungojë në asnjë ndeshje të klubit.

Valverde nuk ishte i vetmi lojtar i Real Madrid që e përfundoi ndeshjen kundër Rayo-s me probleme fizike, pasi edhe Thibaut Courtois raportohet se po ndien shqetësime në kofshë. Edhe ai do t’i nënshtrohet ekzaminimeve mjekësore, por ndjenja e përgjithshme është se dëmtimi i tij nuk është serioz – ndonëse mbetet për t’u parë nëse do të mund të luajë për Belgjikën, e cila ka ndeshje të rëndësishme kualifikuese për Botërorin ndaj Kazakistanit dhe Lihtenshtajnit javën e ardhshme.

Real Madrid do të rikthehet në aksion pas pushimit ndërkombëtar me një udhëtim në fushën e Elches, dhe pa dyshim do të shpresojë që Valverde dhe Courtois të jenë në 100% formë për atë ndeshje, pasi pritet të jetë një tjetër sfidë e vështirë për kryesuesit e La Ligës.