Bruno Fernandes thyen rekordin e asistimeve të Scholesit
Mesfushori i Manchester United, Bruno Fernandes, ishte një figurë kyçe në ndeshjen e raundit të 13-të të Premier League kundër Crystal Palace.
Ai dha dy asistime vendimtare: së pari duke asistuar për Joshua Zirkzee për golin e barazimit, pastaj duke dhuruar një asist për Mason Mount për t’i dhënë epërsinë Djajve të Kuq, transmeton Klankosova.tv
Falë këtyre asistimeve, Fernandes e gdhendi emrin e tij në historinë e klubit: ai tani ka 56 asistime në Premier League, duke tejkaluar legjendarin Paul Scholes (55). Në listën e asistimeve të të gjitha kohërave të United në Premier League, vetëm Ryan Giggs (162), Wayne Rooney (93) dhe David Beckham (80) qëndrojnë mbi të.
Në përgjithësi, ky sezon po shkon mirë për maestron portugez: në 14 paraqitje për Djajtë e Kuq, ai tashmë ka shënuar dy gola dhe ka dhënë pesë asiste.
