Barcelona ankohet në UEFA, pas humbjes nga Atletico Madrid

Barcelona nuk ishte e kënaqur me humbjen 2-0 ndaj Atletico Madridit në ndeshjen e parë të çerekfinales së Champions League. Ata kishin pak ankesa për kartonin e kuq të dhënë për Pau Cubarsi në ndeshjen e parë, por problemi i tyre kryesor lidhet me vendimin për të mos u dhënë një penallti në të dytën.

Hansi Flick ishte i zemëruar me VAR-in që nuk akordoi penallti për Barcelonën pasi Marc Pubill preku topin me dorë gjatë një rivënieje nga porta. Katalanasit besojnë se topi ishte në lojë pasi portieri i Atleticos, Juan Musso, ia kishte pasuar një bashkëlojtari, por ky nuk ishte qëndrimi i gjyqtarit kryesor Istvan Kovacs dhe as i ekipit të VAR-it.

Sipas MD-së, Barcelona tashmë ka paraqitur një ankesë zyrtare në UEFA. Ata theksojnë se prekja me dorë e Pubillit ishte një “shkelje e qartë” që nuk lë vend për interpretim, dhe për këtë arsye duhej të ishte konstatuar nga gjyqtari ose VAR-i.

Barcelona ka përmendur edhe precedentë në ankesën e saj, duke iu referuar një ndeshjeje të sezonit të kaluar në Champions League mes Club Brugge dhe Aston Villa, ku një incident i ngjashëm pati përfundim tjetër. Tyrone Mings u ndëshkua për një veprim të njëjtë gjatë një rivënieje nga porta, çka bëri që belgët të fitonin një penallti.

Barcelona e di se rezultati nuk do të ndryshojë nga kjo ankesë, por kërkon që gabimi i supozuar të pranohet nga UEFA, si dhe të ketë qasje në komunikimet mes Kovacs dhe ekipit të VAR-it në “Spotify Camp Nou”. Në letrën e saj, klubi ka përmendur gjithashtu edhe vendimin për të mos e përjashtuar kapitenin e Atleticos, Koke Resurreccion, për dy ndërhyrje që meritonin karton të verdhë.

Mbetet të shihet nëse ankesa e Barcelonës do të ketë ndonjë efekt, por për Flickun dhe skuadrën e tij, nuk ka shumë çfarë të bëjnë – përveçse të tentojnë rikthimin në ndeshjen e kthimit në “Riyadh Air Metropolitano” javën e ardhshme.