Fushata për balotazh nga 3 - 9 nëntor

Komisioni Qendror i Zgjedhjeve ka vendosur që aktivitetet zgjedhore për rundin e dytë të zgjedhjeve lokale për kryetarë të komunave do të jenë nga 3 deri më 9 nëntor 2025 (06:59).

Sipas vendimit të KQZ-së, për miratimin e planit të aktiviteteve, fushata zgjedhore për subjektet politike dhe kandidatët që garojnë në raundin e dytë do të fillojë më 3 nëntor dhe do të përfundojë në orën 06:59 më 9 nëntor.

Po sipas vendimit të KQZ-së, nga 26 tetori deri më 29 tetor është planifikuar të bëhet dërgimi i fletëvotimeve për votuesit jashtë Kosovës, të cilët janë regjistruar gjatë raundit të parë dhe që i takojnë komunave ku do të mbahet raundi i dytë. Ndërkaq, votimi përmes postës do të fillojë më 27 tetor dhe do të përfundojë më 8 nëntor 2025.

KQZ-ja do t’u japë mundësi subjekteve politike që do të garojnë në rundin e dytë që të akreditojnë vëzhgues shtesë dhe të konfirmojnë vëzhguesit e akredituar. Kjo mund të bëhet nga data 28 tetor deri më 3 nëntor.

Edhe mediat, OJQ-të, organizatat ndërkombëtare dhe përfaqësuesit diplomatike do të duhet që të konfirmojnë vëzhguesit e tyre nga 31 tetori deri më 3 nëntor 2025.

Në këtë mbledhje, KQZ-ja mori vendim për miratimin e rekomandimeve për përfshirjen në rezultatet përfundimtare të rezultateve që dolën pas rinumërimit të 16 kutive të votimit nga 12 vendvotime të ndryshme. Vendvotimet e rinumëruara me vendim të KQZ-së për shkak të evidentimit të mospërputhjeve, janë: Deçan (0105/03 – Kuvend Komunal); Gllogoc (0305/02, 0327/01, 0329/02 – Kuvend Komunal), Gjilan (0408/05, 0408/06 – Kryetar Komune dhe Kuvend Komunal), Lipjan (1301/08 – Kuvend Komunal), Prishtinë (1904/04 – Kryetar Komune dhe Kuvend Komunal), Prizren (2034/04 – Kryetar Komune; 2034/01 | 2034/03 – Kuvend Komunal), Shtime (2207/01 – Kryetar Komune) dhe Suharekë (2404/01 – Kuvend Komunal).

Gjithashtu, në mbledhje është bërë e ditur se personat që mbushin 18 vjeç do të përfshihen në listën e votuesve për raundin e dytë të zgjedhjeve. Ndërsa ata që mbushin 18 vjeç dhe jetojnë jashtë Kosovës do të duhet të vijnë në Kosovë për të votuar. Po ashtu, personat që kanë hequr dorë nga shtetësia e Kosovës do të largohen drejtpërdrejt nga lista e rregullt e votuesve në Kosovë.