Ukraina dhe Rusia shkëmbejnë nga 185 të burgosur lufte

Ukraina dhe Rusia kanë shkëmbyer nga 185 pjesëtarë të forcave të tyre në raundin e fundit të shkëmbimit të të burgosurve të luftës, kanë bërë të ditur zyrtarë nga të dy vendet.

Sipas presidentit ukrainas Volodymyr Zelensky, shumica e 185 ukrainasve të kthyer kanë qenë në robëri ruse që nga viti 2022, raporton agjencia e lajmeve “Reuters”.

Shtabi i Përgjithshëm i Ukrainës njoftoi se personi më i moshuar i kthyer në këtë shkëmbim është 62 vjeç.

Ky shkëmbim është i dyti në kuadër të një marrëveshjeje mes dy vendeve për lirimin e gjithsej 1.000 të burgosurve të luftës nga secila palë, si pjesë e një armëpushimi treditor të ndërmjetësuar nga Shtetet e Bashkuara në fillim të majit.

Në procesin e ndërmjetësimit kanë marrë pjesë edhe Emiratet e Bashkuara Arabe, të cilat kanë ndihmuar edhe në shkëmbimet e mëparshme, njoftoi Ministria e Mbrojtjes e Rusisë përmes Telegramit.