ASK: Rritje prej 11,8% e të ardhurave nga taksat mjedisore në vitin 2025

Agjencia e Statistikave të Kosovës ka publikuar të dhënat më të fundit për taksat mjedisore për vitin 2025, ku vërehet një rritje e ndjeshme e të hyrave krahasuar me vitin paraprak.

Sipas raportit zyrtar, të ardhurat nga taksat mjedisore kanë arritur në 422.446.139 euro, që përfaqëson një rritje prej 11,8% krahasuar me vitin 2024, kur këto të ardhura ishin 377.704.566 euro.

Taksat e energjisë (akciza) vazhdojnë të jenë burimi kryesor i të ardhurave mjedisore, me 365.303.771 euro në vitin 2025, ose 86.5% të totalit. Kjo kategori shënoi rritje prej 12,0% krahasuar me vitin 2024.

Pas tyre renditen:

Taksat e transportit: 53.990.341 euro (rritje 9.6%)

Taksat e ndotjes: 3.152.027 euro (rritje 35.3%)

Sipas ASK-së, struktura e përgjithshme e të ardhurave mjedisore në vitin 2025 është:

Energji: 86,5%

Transport: 12,8%

Ndotje: 0,7%

Rritje edhe në raport me BPV-në

Në raport me Bruto Produktin Vendor (BPV), pjesëmarrja e taksave mjedisore është rritur në 3,83%, nga 3,60% sa ishte në vitin 2024.

Raporti thekson se rritja e vazhdueshme e të hyrave nga taksat mjedisore reflekton kryesisht konsumin e energjisë dhe peshën e akcizës në strukturën fiskale. /Zëri