Aksident trafiku në rrugën Mitrovicë–Prishtinë, lëndohen tre persona

Tre persona kanë mbetur të lënduar në një aksident trafiku, që ka ndodhur sot në rrugën nacionale Mitrovicë–Prishtinë, në segmentin që kalon nëpër fshatin Doberllukë.

Lajmin për Zeri.info e ka konfirmuar zëdhënësi i Policisë së Kosovës për rajonin e Mitrovicës, Avni Zahiti.

“Rreth orës 14:30 është raportuar një aksident trafiku në rrugën nacionale Mitrovicë–Prishtinë, në fshatin Doberllukë. Në aksident janë përfshirë dy automjete në lëvizje, ndërsa si pasojë e përplasjes, tre persona kanë pësuar lëndime trupore”, ka thënë Zahiti.

Ai bëri të ditur se të lënduarit kanë marrë trajtim mjekësor, ndërsa njësitet policore kanë dalë në vendin e ngjarjes dhe kanë nisur hetimet për të sqaruar shkaqet dhe rrethanat e aksidentit. /Zëri