I prodhuar nga “The Guardian”, dokumentari për Gazën do të ketë premierën botërore në Festivalin e Venecias

Një dokumentar i ri mbi fushatën e bombardimeve izraelite në Gazë, me regji të fituesve të çmimit Oscar, Yuval Abraham dhe Rachel Szor, do të ketë premierën botërore në Festivalin e Filmit në Venecia.

Filmi titullohet “NAZA” dhe është prodhuar nga “The Guardian” në bashkëpunim me Jim Wilson, ndërsa producent ekzekutiv është Jonathan Glazer, pjesë e ekipit që qëndroi pas filmit “The Zone of Interest”.

“NAZA” do të jetë i vetmi dokumentar që këtë vit do të konkurrojë për “Luanin e Artë”, çmimin më prestigjioz të festivalit të Venecias.

Nga autorët e “No Other Land”Yuval Abraham dhe Rachel Szor ishin dy nga katër regjisorët e dokumentarit “No Other Land”, i cili fitoi Oscar për dokumentarin më të mirë në vitin 2025.

Filmi ishte bashkëdrejtuar edhe nga Basel Adra dhe Hamdan Ballal dhe trajtonte realitetin e komuniteteve palestineze në Bregun Perëndimor.

Duke njoftuar projektin e ri, autorët e “NAZA”-s deklaruan se filmi është xhiruar gjatë natës në çatitë e Tel Avivit dhe se synon të hetojë në detaje sistemet që, sipas tyre, qëndrojnë pas vrasjes së civilëve palestinezë gjatë luftës në Gaza.

Çfarë do të thotë “NAZA”?

Sipas “The Guardian”, titulli “NAZA” vjen nga një akronim i përdorur brenda ushtrisë izraelite.

Gazeta thotë se termi përdoret në mënyrë eufemistike nga inteligjenca izraelite për t’iu referuar numrit të civilëve që parashikohet se mund të vriten gjatë një sulmi ajror.

Dokumentari bazohet në një sërë hetimesh të publikuara mes viteve 2023 dhe 2025 nga mediumi izraelito-palestinez “+972”, platforma në gjuhën hebraike “Local Call” dhe “The Guardian”.

“No Other Land” dhe jehona pas Oscar-it

Dokumentari i mëparshëm “No Other Land” ishte vlerësuar nga kritiku i filmit i “The Guardian”, Peter Bradshaw, si një vepër “e zymtë dhe kthjelluese”.

Pak kohë pasi filmi fitoi Oscar-in, bashkëregjisori Hamdan Ballal u sulmua nga kolonë izraelitë dhe u arrestua përkohësisht.

Më pas, Akademia Amerikane e Filmit kërkoi falje pasi një deklaratë fillestare në mbështetje të tij nuk e përmendi me emër Ballalin dhe as filmin “No Other Land”.

“NAZA” hyn në garën kryesore të Venecias

Premiera në Venecia e vendos “NAZA” menjëherë në qendër të vëmendjes ndërkombëtare, jo vetëm për shkak të temës së ndjeshme, por edhe për faktin se filmi vjen nga një ekip që tashmë ka fituar vlerësim të madh në skenën ndërkombëtare të dokumentarit.

Si i vetmi dokumentar në garë për “Luanin e Artë”, filmi pritet të jetë një nga titujt më të diskutuar të edicionit të sivjetmë të festivalit. /GazetaExpress