Prattipati në pritjen për 250-vjetorin e Pavarësisë së SHBA-së: Kosova nuk është lidere e ardhshme në rajon

E Ngarkuara me Punë e Shteteve të Bashkuara të Amerikës në Kosovë, Anu Prattipati, ka organizuar një pritje solemne në Prishtinë me rastin e 250-vjetorit të Pavarësisë së Shteteve të Bashkuara të Amerikës, ku ka theksuar rëndësinë e historisë amerikane, miqësisë me Kosovën dhe forcimit të bashkëpunimit mes dy vendeve, raporton Ekonomia Online.

Në këtë ngjarje morën pjesë përfaqësues të institucioneve të Kosovës, liderë politikë, përfaqësues diplomatikë, partnerë ndërkombëtarë, shoqëri civile dhe pjesëtarë të komunitetit të biznesit.

Në fjalimin e saj, Prattipati ka thënë se ky përvjetor shënon një moment historik për Shtetet e Bashkuara, duke kujtuar themelet mbi të cilat është ndërtuar shteti amerikan.

“Jemi mbledhur këtu për të festuar një moment vërtet historik, 250-vjetorin e pavarësisë së Amerikës. Dyqind e pesëdhjetë vjet më parë, etërit tanë, themeluesit tanë, nisën një komb të bazuar në guxim, qëndrueshmëri, inovacion dhe besimin e qëndrueshëm se çdo brez mund të ndërtojë një të ardhme më të fortë dhe më të begatë se ai i mëparshmi. Nga ndjekja e ëndrrës amerikane deri te mbrojtja e lirisë, nga hapat e parë në Hënë deri te përparimet në teknologji, Shtetet e Bashkuara gjithmonë kanë parë përpara, duke u përpjekur të krijojnë një bashkim më të përsosur”, ka deklaruar Prattipati.

Ajo ka thënë se 250-vjetori nuk përfaqëson vetëm një kujtim të së kaluarës, por edhe një angazhim për të ardhmen, duke theksuar rëndësinë e demokracisë, sundimit të ligjit dhe krijimit të mundësive për brezat e rinj.

“Ndërsa shënojmë këtë vit të 250-të, ne nderojmë jo vetëm arritjet e së kaluarës, por edhe premtimin e një të ardhmeje të ndërtuar mbi forcën, inovacionin dhe mundësinë. Mësimi i 250 viteve të para të Amerikës është se kombet e lira dhe sovrane janë më të forta kur investojnë në njerëzit e tyre, qeverisin veten dhe krijojnë mundësi për brezat e ardhshëm. Këto janë parime që vazhdojnë të udhëheqin partneritetin tonë me Kosovën sot”, ka thënë ajo.

Duke folur për marrëdhëniet mes Kosovës dhe Shteteve të Bashkuara, Prattipati ka vlerësuar se kjo miqësi është ndërtuar mbi respekt, vlera të përbashkëta dhe një vizion të përbashkët për të ardhmen.

“Ne e pranojmë se historia e Amerikës nuk është shkruar vetëm në vendin tonë, por edhe në miqësitë dhe partneritetet që kemi ndërtuar në mbarë botën. Pak miqësi e pasqyrojnë më afër këtë frymë sesa ajo e ndërtuar mes Shteteve të Bashkuara dhe popullit të Kosovës, një marrëdhënie e ndërtuar mbi vlera të përbashkëta, respekt të ndërsjellë dhe një besim të përbashkët në një të ardhme të përcaktuar nga mundësia dhe siguria”, është shprehur ajo.

Prattipati ka përmendur edhe përvojat e saj gjatë vizitave në Kosovë, duke thënë se ka parë nga afër ndikimin e bashkëpunimit mes dy vendeve në fusha të ndryshme.

“Gjatë vitit të kaluar, kam pasur privilegjin të udhëtoj nëpër Kosovë dhe të takoj njerëz që mishërojnë më të mirën e bashkëpunimit mes dy vendeve tona. Kam parë vullnetarë të Korpusit të Paqes duke punuar krah për krah me komunitetet lokale, ish-pjesëmarrësit tanë të programeve të shkëmbimit të qeverisë amerikane duke udhëhequr me vizion dhe integritet, si dhe sipërmarrës dhe studentë të rinj duke nxitur ndryshimin dhe inovacionin. Populli i Kosovës është ura mes kombeve tona dhe ata janë dëshmi se vlerat që ndajmë, demokracia, kreativiteti dhe qëndrueshmëria, janë të gjalla dhe të fuqishme”, ka deklaruar ajo.

Ajo ka theksuar se Kosova dhe SHBA-ja kanë ndërtuar një partneritet të bazuar në interesa dhe objektiva të përbashkëta.

“Historia jonë na ka lidhur si kombe me mendësi të njëjtë, që ndajnë të njëjtat qëllime dhe parime. Kosova gjithmonë ka qëndruar me Shtetet e Bashkuara, duke mbështetur prioritetet tona, duke kontribuar në forcën ndërkombëtare të stabilizimit, në paqen kufitare, duke investuar në arsim dhe teknologji”, ka thënë Prattipati.

Ajo ka rikonfirmuar mbështetjen amerikane për Kosovën në proceset e saj zhvillimore dhe demokratike.

“Po ashtu, Shtetet e Bashkuara qëndrojnë me Kosovën. Ne qëndrojmë me Kosovën në përpjekjet e saj për të ndërtuar institucione të forta demokratike. Ne qëndrojmë me Kosovën ndërsa ajo punon për të krijuar një ekonomi të begatë që tërheq investime dhe zgjeron mundësitë për të gjithë qytetarët e saj”, ka deklaruar ajo.

Sipas Prattipatit, forcimi i marrëdhënieve ekonomike dhe tregtare mes dy vendeve është një mundësi e rëndësishme për të ardhmen.

“Mezi presim ta forcojmë partneritetin tonë, përfshirë përmes rritjes së tregtisë që avancon prosperitetin e përbashkët, sepse një Kosovë stabile, demokratike dhe e begatë nuk është vetëm e mirë për popullin e Kosovës, por është e mirë për Evropën dhe e mirë për botën”, ka shtuar ajo.

Ajo ka vlerësuar edhe rolin e Kosovës në rajon, duke thënë se vendi ka potencial të jetë një lider në fusha të rëndësishme.

“Investimi juaj në programin Fulbright, përkushtimi juaj ndaj inovacionit dhe roli juaj si eksportues i sigurisë tregojnë se Kosova nuk është vetëm një partner, por një udhëheqës i ardhshëm në rajon. Ndërsa Kosova vazhdon të zhvillohet dhe të thellojë integrimin e saj me komunitetin ndërkombëtar, mundësitë për bashkëpunim, veçanërisht në mbrojtje, tregti, investime ekonomike dhe energji, janë të pafundme”, ka deklaruar Prattipati.

Ndërkaq, ushtruesja e detyrës së presidentes së Kosovës, Albulena Haxhiu, në fjalimin e saj ka vlerësuar rolin e Shteteve të Bashkuara në historinë e demokracisë dhe në mbështetjen ndaj shqiptarëve dhe Kosovës.

Ajo ka thënë se përvjetori i pavarësisë amerikane rikthen vëmendjen te parimet mbi të cilat është ndërtuar shteti amerikan.

“Sonte, ne festojmë 250 vjet të Pavarësisë së Amerikës. Një numër i tillë lehtësisht mund të shndërrohet vetëm në një ceremoni. Por në rastin e Amerikës, ai na kthen te një revolucion që nisi me një pyetje shumë konkrete politike: Kush ka të drejtë të qeverisë dhe nga buron kjo e drejtë?”, ka thënë Haxhiu.

Ajo ka theksuar se parimet e vitit 1776 vazhdojnë të jenë aktuale edhe sot.

“Përgjigjja e dhënë në vitin 1776 ishte radikale për kohën e saj dhe mbetet sfiduese edhe sot. Pushteti nuk qëndron mbi popullin; ai e merr legjitimitetin nga populli dhe duhet të kufizohet nga ligji, përfaqësimi dhe barazia qytetare”, është shprehur ajo.

Haxhiu ka rikujtuar edhe lidhjet historike të shqiptarëve me Shtetet e Bashkuara, duke përmendur rolin e figurave si Fan Noli, Faik Konica dhe Hasan Prishtina.

“Shqiptarët e kuptuan herët se parimet amerikane kishin rëndësinë më të madhe atëherë kur e ardhmja e një kombi vendosej pa praninë e popullit të tij në tryezën e vendimmarrjes”, ka deklaruar ajo.

Duke folur për Kosovën, Haxhiu ka theksuar se kërkesa për vetëvendosje ka qenë pjesë e historisë së popullit të Kosovës për dekada.

“Hasan Prishtina e sjell Kosovën në këtë histori. I lindur në Vushtrri, i arsimuar në Selanik dhe Stamboll dhe i zgjedhur në parlamentin osman, ai e dinte se sa lehtë kombet e vogla mund të diskutoheshin nga të tjerët dhe të vendosej për to nga të tjerët”, ka thënë ajo.

Sipas saj, kërkesa e Kosovës për të vendosur për të ardhmen e saj ka qenë një kërkesë historike.

“Pas Luftës së Parë Botërore, ai i dha zë kërkesës së Kosovës brenda kërkesës më të gjerë shqiptare për vetëvendosje. Kosova ende nuk ishte shtet, por pretendimi që më vonë do ta përcaktonte historinë e saj moderne ishte tashmë aty: një popull duhet të ketë të drejtë të vendosë për të ardhmen e vet”, ka shtuar Haxhiu.