Fluks në Merdar, pritjet për të dalë nga Kosova deri një orë

Pritje të gjata janë regjistruar mëngjesin e së shtunës në disa pika të kalimit kufitar të Kosovës, ndërsa më e ngarkuara paraqitet pika kufitare në Merdarë.

Sipas të dhënave të fundit për fluksin në kufi, në Merdarë pritjet për automjetet në dalje nga Kosova arrijnë deri në 60 minuta, ndërsa kolona është rreth 800 metra.

Ngarkesë është raportuar edhe në pikën kufitare në Dheu i Bardhë, ku pritjet në dalje janë deri në 30 minuta, ndërsa kolona arrin rreth 250 metra.

Në Hani të Elezit pritjet në hyrje janë rreth 10 minuta, ndërsa në Jarinje dhe Muçibabë lëvizja është më e shpejtë, me pritje prej 5 deri në 10 minuta në hyrje.

Në pikat e tjera kufitare, përfshirë Bërnjakun, Glloboqicën, Kullën, Mutivodën, Qafën e Morinës, Qafën e Prushit, Stançiqin dhe Vërmicën, pritjet janë kryesisht 3 deri në 5 minuta dhe nuk raportohen kolona të automjeteve.

Sa u përket kamionëve, situata paraqitet e qetë në të gjitha pikat e kalimit kufitar, me pritje prej rreth 3 deri në 5 minuta dhe pa kolona të raportuara.

Merdarë është një nga pikat kryesore kufitare të Kosovës dhe një nga korridoret më të rëndësishme për qarkullimin e udhëtarëve dhe mallrave drejt Serbisë.

Të dhënat për fluksin kufitar mund të ndryshojnë gjatë ditës, veçanërisht gjatë fundjavës dhe periudhave me qarkullim të shtuar. /Zëri