Çështja e presidentit, Haxhiu: Ramush Haradinaj është njeriu i duhur në kohën e duhur
Partia Demokratike e Kosovës dhe Aleanca janë mbledhur sërish të premten në sallën e Kuvendit të Kosovës, duke kërkuar vazhdimin e seancës konstituive.
Në ambientet e Kuvendit, përveç deputetëve dhe përfaqësuesve të PDK-së e AAK-së, të pranishëm kanë qenë edhe përfaqësues të Ambasadës së Shteteve të Bashkuara të Amerikës në Kosovë.
Për këtë, deputetja e Aleancës, Teuta Haxhiu ka deklaruar se interesimi i ambasadorëve të SHBA-së për të marrë pjesë në seancën konstituive, është sepse në situatën që Kosova po kalon këto ditë, sipas saj është një situatë që nuk ka ndodhur asnjëherë më parë.
Kjo situatë sipas Haxhiut, është një çështje që ka humbur shpresat e qytetarëve dhe prania e ambasadorëve të sotëm në seancë, është për të iu dërguar mesazh atyre “që e duan këtë vend”.
“Kurrë nuk e kemi pasur gjendjen më të rënduar emocionale të qytetarëve të vendit tonë…interesimi i ambasadorëve të ShBA-së për në seancën konstituive shkon për shkak se situata për të cilën po kalojmë këto ditë është një situatë nuk ka ndodhur asnjëherë dhe është një situatë që ka humbur shpresën e qytetarëve në këtë vend, tani në qoftëse ata na kanë ndihmuar dhe kanë qenë mbështetës përkrahës që të zhvillohet ky vend, sot po vijnë për të dërguar edhe mesazhet po mesazhet dërgohen tek njerëzit që e duan këtë vend dhe ajo që po shihet janë njerëzit që më së paku po e duan këtë vend”, ka deklaruar Haxhiu në Tëvë1.
Ndërkohë, për bllokadën politike, Haxhiu thotë se Kurti nuk është i gatshëm për qeverisje, duke shtuar se shkelësit më të mëdhenj të Gjykatës Kushtetuese janë Kurti me bashkëpunëtorët e tij.
“Kurti nuk është për të bërë zgjidhje, nuk është për të ec përpara po ec për të bërë situata që më së miri Kurti din me jetu dhe ajo është pjesa destabilizim në këtë vend. Nuk është i gatshëm dhe nuk dinë unë mendoj që një pjesë shumë e madhe e njerëzve që kanë marrë detyra janë të padijshëm. Shkelësit më të mëdhenj të Gjykatës Kushtetuese janë Albin Kurti me varësit e tij”, tha ajo.
Ndërkaq, sa i përket një emri për president të vendit, Haxhiu përmendi Ramush Haradinaj, që sipas saj, kjo figurë është njeriu i duhur në kohën e duhur.
“Haradinaj është njeriu më i duhur në kohën e duhur që kish me i përfaqësua të gjitha njerëzit që kanë kontribuar për këtë vend dhe është njeriu që i ka dyert hapur kudo në Amerikë, në BE, pra njerëzit që vyejnë në këto pozicione duhet njerëz që qojnë përpara procese dhe janë të mirëpritur, megjithatë ne nuk kemi diskutuar asnjëherë për emra për president, nuk na e ka dhënë mundësinë Kurti as me diskutua për shkak të kërkesave tona, s’na ka kthyer përgjigje asnjëherë, ne atëherë s’kemi pasur çka me diskutua në këtë drejtim”, përfundoi Haxhiu.
