Ambasada e Kosovës në Hagë pas aktgjykimit: Ruani qetësinë dhe maturinë, të mos biem pre e provokimeve!

Ambasada e Republikës së Kosovës në Hagë ka reaguar pas aktgjykimit të shpallur sot nga Dhomat e Specializuara të Kosovës ndaj Hashim Thaçit, Kadri Veselit, Jakup Krasniqit dhe Rexhep Selimit.

Në reagim, Ambasada ka shprehur zhgënjim të thellë lidhur me vendimin, duke theksuar se beson që aktgjykimi mund të ndryshohet në shkallën e Apelit.

Ambasada ka deklaruar se e ka përcjellë me “shqetësim të lartë” vendimin e sotëm, ndërsa ka thënë se ai ka shkaktuar zhgënjim në Kosovë.

Sipas Ambasadës, lufta e Ushtrisë Çlirimtare të Kosovës ishte “e drejtë, vetëmbrojtëse dhe e domosdoshme”, duke shtuar se, sipas saj, këtë fakt nuk e ndryshon vendimi i Gjykatës.

Njoftimi i plotë:

Ambasada e Republikës së Kosovës në Hagë ka ndjekur me shqetësim të lartë verdiktin e dhënë sot nga Dhomat e Specializuara të Kosovës lidhur me rastin e liderëve të UÇK-së, z. Hashim Thaçi, z. Kadri Veseli, z. Jakup Krasniqi dhe z. Rexhep Selimi.

Ky vendim ka shkaktuar, me të drejtë, zhgënjim të thellë në mbarë Kosovën dhe përbën një lajm thellësisht zhgënjyes për të gjithë ne.

Ushtria Çlirimtare e Kosovës ka bërë një luftë të drejtë, vetëmbrojtëse dhe të domosdoshme. Këtë fakt nuk e ndryshon askush, asnjëherë. Besojmë se aktgjykimi përfundimtar në shkallën e apelit do ta ndryshojë këtë interpretim dhe këtë aktgjykim.

Në këto momente, shprehim solidaritetin tonë me familjet e z. Hashim Thaçi, z. Kadri Veseli, z. Jakup Krasniqi dhe z. Rexhep Selimi.

Në të njëjtën kohë, Ambasada e Republikës së Kosovës u bën thirrje qytetarëve të Republikës së Kosovës që ndodhen në Hagë të ruajnë qetësinë dhe maturinë, të mos bien pre e provokimeve, të respektojnë rregullat dhe kushtet mbi të cilat është dhënë leja për protestën nga Komuna e Hagës, si dhe të respektojnë shtetin mik, Mbretërinë e Holandës.

Dhuna nuk lejohet. Paqja, dinjiteti dhe respektimi i ligjit janë përgjegjësi e të gjithëve.