EULEX-i mohon pretendimet për keqpërdorim të armëve në rastin e vizitës së Jakup Krasniqit
Foto: Laura Hasani

EULEX-i mohon pretendimet për keqpërdorim të armëve në rastin e vizitës së Jakup Krasniqit

Aktuale November 20, 2026 - 20:31

Misioni i Bashkimit Evropian për Sundimin e Ligjit në Kosovë (EULEX) ka reaguar ndaj raportimeve të disa mediave për një trajtim të pretenduar të papërshtatshëm të armëve të zjarrit nga zyrtarët e Policisë së EULEX-it, gjatë ofrimit të mbështetjes logjistike dhe operative për Dhomat e Specializuara të Kosovës në rastin e Jakup Krasniqit.

Përmes një komunikate, EULEX-i i ka cilësuar këto pretendime si të pabazuara dhe i ka mohuar kategorikisht ato.Misioni ka sqaruar se rasti ka të bëjë me një vizitë në paraburgim (rasti i Jakup Krasniqir), e cila ishte realizuar për arsye të domosdoshme humanitare.

“EULEX-i thekson fuqishëm se zyrtarët policorë të misionit nuk kanë drejtuar asnjë armë ndaj askujt, në asnjë moment”, thuhet në reagim.

EULEX-i ka theksuar gjithashtu se armët e zjarrit nga personeli i tij trajtohen në përputhje të rreptë me standardet ndërkombëtare dhe evropiane.

Reagimi i misionit vjen pas raportimeve nga disa media se një pjesëtar i EULEX-it ia ka drejtuar armën familjarit të Jakup Krasniqit.