BE-ja, thirrje për përgjegjësi të plotë pas vrasjes së një ushtari tjetër në Liban

Shefja e politikës së jashtme të BE-së dënoi të dielën vrasjen e një ushtari tjetër të Forcës së Përkohshme të OKB-së në Liban (UNIFIL) në fillim të kësaj jave dhe përsëriti thirrjet e bllokut për përgjegjësi.

Në një deklaratë, Kaja Kallas tha se BE-ja u bën thirrje të gjithë aktorëve që t'i përmbahen plotësisht kushteve të marrëveshjes midis Izraelit dhe grupit libanez Hezbollah dhe të refuzojnë "çdo kusht shtesë nga Hezbollahu".

Deklarata nënvizonte se populli libanez po paguan një çmim humanitar dhe socio-ekonomik “të rëndë dhe të papranueshëm” nga përshkallëzimi i vazhdueshëm dhe sulmet ajrore.

"BE-ja kërkon zbatimin e plotë të Rezolutës 1701 të Këshillit të Sigurimit të OKB-së, e cila bën thirrje për respektimin e sovranitetit dhe integritetit territorial të Libanit nga Izraeli dhe çarmatimin e grupeve të armatosura jo-shtetërore, përfshirë Hezbollahun".

Kallas riafirmoi gjithashtu mbështetjen e plotë të bllokut për UNIFIL-in dhe mandatin e tij, duke thënë se BE-ja "dënon fuqimisht të gjitha sulmet kundër personelit të saj, përfshirë vrasjen e një ushtari tjetër të UNIFIL-it në sulmet e 4 qershorit, paqeruajtësi i shtatë që ka vdekur që nga marsi, dhe i shpreh ngushëllimet e saj të thella familjes së tij".

"Vrasja e paqeruajtësve është një shkelje e ligjit ndërkombëtar dhe duhet të merret përgjegjësi e plotë", shtoi deklarata. /AA