Ushtria izraelite: Sapo përfunduam një operacion ajror kundër sistemeve strategjike mbrojtëse të Iranit

Ushtria izraelite njoftoi se ka përfunduar një operacion ajror në shkallë të gjerë kundër sistemeve strategjike të mbrojtjes ajrore në Iran, në kuadër të përshkallëzimit të konfliktit mes dy vendeve.

Sipas një deklarate të Forcave të Mbrojtjes së Izraelit (IDF), dhjetëra avionë luftarakë të Forcave Ajrore Izraelite morën pjesë në sulmet që nisën gjatë natës dhe kishin në shënjestër objektiva të rëndësishëm të mbrojtjes iraniane.

Ushtria izraelite pretendon se Irani kishte vendosur sisteme të reja mbrojtëse në disa rajone të vendit, në përpjekje për të rikthyer kapacitetet e zbulimit dhe mbrojtjes ajrore, të cilat sipas Tel Avivit ishin dëmtuar gjatë operacionit ushtarak të koduar “Roaring Lion”.

“Gjatë ditëve të fundit, regjimi iranian kishte dislokuar sisteme mbrojtëse në zona të ndryshme për të rivendosur aftësitë e tij të zbulimit dhe mbrojtjes. Sulmet tona çuan në shkatërrimin e këtyre sistemeve”, thuhet në deklaratën e IDF-së.

Autoritetet izraelite nuk dhanë detaje të mëtejshme mbi vendndodhjen e objektivave të goditura apo nivelin e dëmeve të shkaktuara, ndërsa nga ana e Iranit nuk ka ende një reagim zyrtar lidhur me pretendimet e ushtrisë izraelite.

Zhvillimi vjen në një moment tensionesh të larta në Lindjen e Mesme, me sulme dhe kundërsulme të vazhdueshme mes Izraelit dhe Iranit, duke rritur shqetësimet për një konflikt më të gjerë rajonal.