Një protestues vdes gjatë trazirave në Francë, qindra të plagosur
Një protestues ka vdekur nga arresti kardiorespirator gjatë protestave në Paris, sipas policisë franceze. Ndërkohë, më shumë se 1,800 persona janë arrestuar në të gjithë Francën, pas demonstratave të dhunshme që kanë shkaktuar dëme të mëdha materiale.
Sipas France 24, policia franceze ka dislokuar sërish njësitë speciale kundër trazirave (CRS) në Paris të dielën, më 18 tetor, ndërsa tensionet kanë vazhduar edhe pas protestave të së shtunës.
Policia e Parisit ka raportuar një numër rekord prej 855 personash të arrestuar në kryeqytet. Sipas Prokurorisë, 517 persona janë mbajtur në ndalim policor, prej të cilëve 346 të rritur dhe 171 të mitur.
Shumica e arrestimeve kanë të bëjnë me pranimin e mallrave të vjedhura, përfshirjen në grupe me qëllim kryerjen e dhunës dhe vandalizmin.
Mbi 500 policë, xhandarë dhe zjarrfikës të plagosur
Ministri i Brendshëm francez, Laurent Nuñez, ka njoftuar se më shumë se 500 policë, xhandarë dhe zjarrfikës janë plagosur gjatë protestave të së shtunës, duke theksuar se bilanci mbetet paraprak.
Ende nuk ka të dhëna të plota për numrin e demonstruesve të plagosur gjatë përleshjeve.
Në Saint-Étienne, një 17-vjeçari i është këputur dora nga shpërthimi i një granate të përdorur nga policia për kontrollin e turmave.
Tensionet vazhdojnë në Paris, policia përdor gaz lotsjellës
Sipas raportimeve të France 24, situata ka mbetur e tensionuar edhe të dielën në zonën e sheshit République në Paris.
Policia ka përdorur gaz lotsjellës ndaj grupeve ku ndodheshin demonstrues, kalimtarë dhe persona të tjerë të pranishëm.
Zjarre janë raportuar në disa pjesë të kryeqytetit, përfshirë rrugën Rue du Château d'Eau dhe kryqëzimin e rrugëve Rue Léon Jouhaux dhe Valmy.
Zjarrfikësit kanë ndërhyrë për të shuar flakët në barrikadat e ngritura në rrugë.
Rreth 1,500 biznese të dëmtuara, humbjet arrijnë në qindra milionë euro
Protestat e dhunshme kanë shkaktuar dëme të konsiderueshme në biznese dhe ndërtesa publike.
Alexandre Bompard, president i Federatës së Tregtisë dhe Shpërndarjes, ka deklaruar se rreth 1,500 dyqane dhe biznese janë dëmtuar gjatë protestave, ndërsa shumë prej tyre janë plaçkitur.
Sipas tij, humbjet ekonomike vlerësohen në disa qindra milionë euro, megjithëse është ende herët për një shifër të saktë.
Në qytetin Limoges, një zjarr ka shkatërruar një pjesë të ndërtesës historike të bashkisë, duke shkaktuar shembjen e pjesës më të madhe të çatisë.
Macron pritet t'i drejtohet kombit
Presidenti francez Emmanuel Macron pritet t'u drejtohet qytetarëve me një deklaratë zyrtare në orën 20:00 të së dielës.
Sipas Pallatit Élysée, Macron kishte planifikuar një takim me ministrat në orën 17:30, ndërsa qeveria po përballet me presion lidhur me menaxhimin e protestave.
Ndërkohë, kryeministri Sébastien Lecornu ka shtyrë për të hënën, në orën 10:00, mbledhjen ndërministrore të krizës.
Mbledhja do të përqendrohet te ekonomia, tregtia, sigurimet dhe procedurat ligjore pas vandalizmit dhe plaçkitjeve.
Kryetarja e Asamblesë Kombëtare, Yaël Braun-Pivet, ka njoftuar se do të propozojë një hetim parlamentar për dhunën dhe plaçkitjet gjatë demonstratave të 17 tetorit, përfshirë shqyrtimin e strategjisë së forcave të rendit.
Rreth 800 mijë persona morën pjesë në protesta
Protestat nisën rreth një muaj më parë nga nxënësit e shkollave të mesme, të cilët kundërshtonin pabarazinë në arsim dhe gjendjen e përkeqësuar të objekteve shkollore.
Lëvizja më pas u zgjerua, duke përfshirë pakënaqësitë për rritjen e kostos së jetesës, shpenzimet publike dhe mungesën e veprimeve ndaj ndryshimeve klimatike.
Rreth 800 mijë protestues, përfshirë nxënës, punonjës të hekurudhave dhe pjesëtarë të lëvizjes së Jelekëve të Verdhë, morën pjesë në demonstratat kombëtare, të cilat në pjesën më të madhe ishin paqësore.Burimi: France 24.
