46 të vdekur nga përplasja e trenave të shpejtësisë së lartë në Spanjë
Ka shkuar në 46 numri i të vdekurve nga përplasja e dy trenave të shpejtësisë së lartë në Spanjë, në një aksident që ka shkaktuar ndërprerjen e qarkullimit hekurudhor në linjën që lidh Madridin me rajonin jugor të Andaluzisë.
Sipas raportimeve të Sky News, dy trenat kishin së bashku rreth 400 pasagjerë.
Aksidenti ndodhi mes qyteteve Mora dhe Orgaz, kur një tren i kompanisë Renfe dhe një tjetër i kompanisë Iryo, që po udhëtonin nga Madridi drejt Seviljes, u përplasën pak pas orës 09:00, sipas kohës lokale.
Nga përplasja, dy vagonë të trenit Iryo dolën nga shinat. Shkaqet e aksidentit nuk janë bërë ende të ditura.
Operatori hekurudhor Adif njoftoi përmes një postimi në rrjetin social X se qarkullimi në linjën e shpejtësisë së lartë Madrid–Andaluzia është pezulluar pas përplasjes së dy trenave.
Ndërkohë, Manuel Galan, kryetari i bashkisë së Urdës, pranë qytetit të Toledos, ka deklaruar se shërbimet e emergjencës i kishin kërkuar të përgatiste një palestër sportive për strehimin e të lënduarve.
Autoritetet po merren me pasojat e aksidentit, ndërsa rrethanat që çuan në përplasjen e dy trenave mbeten ende të paqarta.
