Tentoi t’u japë ryshfet zyrtarëve policorë, arrestohet shtetasi serb në Vushtrri

Policia e Kosovës ka arrestuar një shtetas serb në rrugën nacionale Mitrovicë-Prishtinë, i cili pasi ka pranuar një gjobë trafiku, u kishte ofruar ryshfet zyrtarëve policorë.

Sipas Policisë, shtetasi serb ua kishte ofruar 1 mijë dinarë zyrtarëve policor.

“Sot, më 30.07.2021, njësia policore, gjatë zbatimit të Planit Operativ ‘Siguria në trafik’, respektivisht gjatë kontrollit të shpejtësisë të automjeteve në një pikë kontrolli, në rrugën nacionale Mitrovicë-Prishtinë (në Vushtrri), kanë ndaluar një automjet, drejtuesi i të cilit kishte tejkaluar shpejtësinë e lejuar. Zyrtarët policorë, pas ndaljes së veturës, drejtuesit të saj ia bëjnë me dije arsyen e ndaljes. Gjatë kohës që zyrtarët policorë po shqiptonin gjobën për tejkalim shpejtësie, i dyshuari B.Gj., viti i lindjes 1978, mashkull serb, ka kërkuar nga zyrtarët policorë të mos i shqiptojnë tiketë dhe ua ka ofruar 1000 (një mijë) dinarë (monedhë e Serbisë)”, thuhet në njoftimin e Policisë.

Nga PK-ja kanë bërë të ditur se pas intervistimit të të dyshuarit, me vendim të prokurorit kujdestar, atij i është caktuar masa e ndalimit prej 48 orëve. /Zëri