Katër të lënduar në aksidentin në rrugën Prishtinë - Podujevë, Policia jep detaje

Një aksident ka ndodhur mbrëmë në rrugën Prishtinë – Podujevë, në fshatin Shakovicë, ku janë përfshirë tri vetura.

Për pasojë, ura ishte bllokuar dhe qarkullimi u ndërpre përkohësisht, ndërsa autoritetet dolën në vendngjarje.

Lajmin e ka konfirmuar zëdhënësja e Policisë së Kosovës për rajonin e Prishtinës, Flora Ahmeti.

"Mbrëmë, rreth orës 21:00 në fshatin Shakovicë të Podujevës ka ndodhur një aksident trafiku ku janë përfshirë tri automjete. Si pasojë e përplasjes, katër persona kanë pësuar lëndime", tha Ahmeti.

Ajo shtoi se personat e lënduar janë dërguar për trajtim mjekësor, ndërsa me rastin po merret Njësiti i Trafikut Rajonal.

Kujtojmë se të dielën kjo rrugë ishte bllokuar si pasojë e ngricave të shkaktuara nga reshjet e borës.