“Eurovizioni” feston 70-vjetorin në Vjenë

Konkursi i Këngës në Eurovizion po përgatitet të festojë përvjetorin e tij të 70-të me një spektakël të jashtëzakonshëm në Vjenë të Austrisë, nga data 12 deri më 16 maj. E cilësuar prej dekadash si “Olimpiada e muzikës pop”, kjo ngjarje vjetore do të mbledhë në skenën e Wiener Stadthalle artistë nga 35 vende të ndryshme, në një kremtim madhështor të fuqisë së muzikës dhe diversitetit kulturor evropian.

Një histori 70-vjeçare, nga testimi teknologjik te fenomeni global

I themeluar në vitin 1956 me qëllim testimin e teknologjisë së transmetimeve të drejtpërdrejta dhe nxitjen e unitetit pas Luftës së Dytë Botërore, Eurovizioni ka evoluar në një fenomen global. Edicioni i vitit të kaluar arriti një audiencë rreth 166 milionë shikues në mbarë botën, ndërsa këtë vit fansa nga 75 vende kanë siguruar tashmë biletat.

Historiani i Eurovizionit, Dean Vuletic, e cilëson këtë event si “zgjedhjen më të madhe të Evropës”, ku muzika shërben si urë lidhëse mes kombeve, duke lënë mënjanë diferencat përmes artit. Për Vjenën, ky është edicioni i tretë si qytet pritës, pas fitores së austriakut JJ vitin e kaluar me baladën “Wasted Love”.Përfaqësimi shqiptar, Alis sjell emocionin e “Nan”

Në këtë edicion jubilar, një vëmendje të veçantë në skenën evropiane pritet të ketë përfaqësimi i Shqipërisë. Këngëtari Alis do të ngjitet në skenë për të interpretuar këngën “Nan”, një performancë që premton thellësi vokale dhe ndjeshmëri artistike.

Në një vit ku rikthimi te rrënjët dhe baladat me peshë shpirtërore po vlerësohen gjithnjë e më shumë, “Nan” e pozicionon Shqipërinë brenda një rryme artistike që synon të prekë drejtpërdrejt emocionet e publikut dhe të jurisë profesioniste evropiane, duke ruajtur identitetin dhe vokalin e fuqishëm që shpesh ka karakterizuar përfaqësimet shqiptare.

Eksperti i njohur Paul Jordan, i mbiquajtur Dr. Eurovision, vëren se konkursi e ka tejkaluar prej kohësh reputacionin e tij si një platformë për “pop të ëmbël”. Sipas tij, edicioni i 70-të ofron një spektër të gjerë muzikor që varion nga pop-opera e ndikuar nga muzika klasike, tek elektro-pop dhe baladat vokale.

“Nuk ka shumë këngë të buta pop. Ka një larmi të tillë sa nuk mendoj se ekziston më diçka e tillë si një ‘tingull Eurovision’,” thekson Jordan.

Struktura e re e votimit dhe zgjerimi global

Spektakli do të drejtohet nga këngëtarja Victoria Swarovski dhe aktori Michael Ostrowski. Për të garantuar transparencë maksimale në këtë përvjetor jubilar, Unioni Evropian i Transmetimeve (EBU) ka përmirësuar rregullat e votimit, duke shtrënguar masat mbrojtëse kundër çdo “aktiviteti të koordinuar” dixhital dhe duke ruajtur balancën mes jurisë dhe publikut.

Ndërkohë që Eurovizioni po konsolidon rrënjët e tij në Evropë, marka po zgjerohet dhe në tregje të reja, me Konkursin e parë të Këngës Eurovizion në Azi që pritet të zhvillohet në Bangkok në muajin nëntor. Megjithatë, magjia e kontinentit të vjetër mbetet e paprekur. Siç përmbledh dhe eksperti Jordan: “Në një kohë kur teknologjia dhe transmetimet po ndryshojnë me shpejtësi, njerëzit ende takohen me televizorin e tyre atë natë të shtunë. Ky festival vazhdon të na bashkojë të gjithëve.”/RTSH