Studim: Inteligjenca artificiale mund të zbulojë ADHD tek fëmijët vite para diagnozës

Një model i ri i inteligjencës artificiale mund të ndihmojë në identifikimin e hershëm të çrregullimit të vëmendjes dhe hiperaktivitetit (ADHD) tek fëmijët, shumë vite përpara se të vendoset diagnoza, sugjeron një studim i ri.

Hulumtimi, i realizuar nga Duke Health dhe i publikuar në Nature Mental Health, analizon të dhënat mjekësore për të parashikuar rrezikun që një fëmijë të zhvillojë ADHD.

Studiuesit përdorën të dhëna nga mbi 140 mijë fëmijë, me dhe pa ADHD, duke përfshirë informacione që nga lindja deri në fëmijërinë e hershme.

Modeli i inteligjencës artificiale arriti të identifikojë modele të fshehura në zhvillimin, sjelljen dhe historinë mjekësore të fëmijëve, të cilat shpesh shfaqen shumë përpara diagnozës.

Sipas autorit kryesor të studimit, Elliot Hill, qëllimi ishte të shfrytëzohen të dhënat ekzistuese për të parashikuar më herët rastet e mundshme të ADHD-së.

Modeli ka treguar saktësi të lartë në parashikimin e ADHD-së tek fëmijët nga mosha 5 vjeç e lart, ndërsa rezultatet kanë qenë të njëjta pavarësisht gjinisë, racës apo statusit ekonomik.

Sipas studiuesve, ky mjet mund të ndihmojë në identifikimin e fëmijëve që kanë nevojë për vlerësim të hershëm dhe mbështetje.

Ekspertët theksojnë se diagnoza dhe trajtimi i hershëm lidhen me rezultate më të mira në shkollë, në zhvillimin social dhe në shëndetin e përgjithshëm të fëmijëve.

Matthew Engelhard, një nga autorët e studimit, ka theksuar se ky model nuk zëvendëson mjekët, por shërben si një mjet ndihmës për të orientuar më mirë kujdesin ndaj pacientëve.

“Ky nuk është një ‘mjek artificial’, por një mënyrë për të ndihmuar që fëmijët të mos presin me vite për një diagnozë,” ka thënë ai.

Studiuesit vlerësojnë se përdorimi i teknologjisë së tillë mund të përmirësojë ndjeshëm identifikimin dhe trajtimin e hershëm të ADHD-së.