OBSH: Temperatura ekstreme, kërcënim serioz për shëndetin publik në Evropë
Temperaturat ekstreme po shfaqen gjithnjë e më shumë si një kërcënim serioz për shëndetin publik në Evropë. Sipas të dhënave të Organizatës Botërore të Shëndetësisë (OBSH), mbi 200 mijë persona kanë humbur jetën gjatë katër viteve të fundit nga shkaqe që lidhen me të nxehtin, ndërsa shumica e këtyre rasteve vlerësohen si të parandalueshme.
Drejtori Rajonal i OBSH-së për Evropën, Hans Henri P. Kluge, ka paralajmëruar se nxehtësia ekstreme është ndër pasojat më të drejtpërdrejta dhe më vdekjeprurëse të ndryshimeve klimatike. Sipas tij, valët e të nxehtit nuk mund të konsiderohen më fenomene të izoluara, por një krizë e përsëritur që po rëndon sistemet shëndetësore, infrastrukturën dhe shërbimet publike.
OBSH u ka bërë thirrje qeverive evropiane të ndërmarrin masa më të forta mbrojtëse për qytetarët. Organizata rekomandon hartimin e planeve të veçanta për përballimin e të nxehtit, përfshirë krijimin e qendrave të freskimit në qytete, shtimin e hapësirave të gjelbra, mbrojtjen e të moshuarve dhe grupeve më të cenueshme, si dhe përshtatjen e orareve të punës gjatë ditëve me temperatura të larta.
Sipas OBSH-së, Evropa po ngrohet më shpejt se shumica e rajoneve të tjera të botës. Plakja e popullsisë, urbanizimi i shpejtë dhe rritja e vazhdueshme e temperaturave po rrisin ndjeshëm rrezikun e sëmundjeve dhe vdekjeve të lidhura me të nxehtin.
Organizata thekson se masat parandaluese mund të shpëtojnë mijëra jetë çdo vit dhe synon uljen në minimum të vdekjeve të shkaktuara nga temperaturat ekstreme përmes bashkëpunimit institucional dhe zbatimit të politikave të përshtatjes ndaj ndryshimeve klimatike.
