Mungesa e mukusit të qafës së mitrës mund të ndikojë në fertilitet
Nëse vëreni se keni shumë pak mukus të qafës së mitrës, kjo mund të lidhet me fertilitetin, por nuk do të thotë domosdoshmërisht se ekziston një problem serioz.
Hapi i parë është të përcaktoni nëse po ndodh ovulimi. Një mënyrë praktike është matja e temperaturës bazale çdo mëngjes me termometër digjital. Pas ovulimit, temperatura zakonisht rritet dhe qëndron më e lartë deri në ardhjen e menstruacioneve.
Nëse nuk po ovuloni, mund të nevojiten ndryshime në stilin e jetesës dhe një konsultë me specialistin e fertilitetit. Edhe pesha trupore mund të ndikojë. Pesha shumë e ulët mund të shoqërohet me nivele të pamjaftueshme të estrogjenit për ovulim, ndërsa mbipesha mund të çrregullojë ekuilibrin hormonal dhe të pengojë ovulimin, shkruan Baby Center transmeton Gazeta Shneta.
Duhet bërë dallimi edhe mes mukusit të qafës së mitrës dhe lubrifikimit vaginal që shfaqet gjatë eksitimit seksual.
Stresi dhe marrëdhëniet seksuale të planifikuara vetëm për të arritur shtatzëninë mund të kontribuojnë në thatësi vaginale. Në këto raste, mund të përdoret një lubrifikant i përshtatshëm për çiftet që po përpiqen të konceptojnë, pasi disa lubrifikantë të zakonshëm mund të ndikojnë te spermatozoidet.
Edhe disa trajtime të fertilitetit, si Clomid, mund të nxisin ovulimin, por njëkohësisht të zvogëlojnë mukusin e qafës së mitrës. Në raste të tilla, inseminimi intrauterin (IUI) mund të përdoret për të vendosur spermatozoidet drejtpërdrejt në mitër, duke anashkaluar qafën e mitrës.
Hidratimi i mirë dhe shmangia e disa barnave që thajnë mukozat, përfshirë disa antihistaminikë dhe barna për ftohjen, mund të ndihmojnë gjithashtu. Nëse mungesa e mukusit vazhdon ose shoqërohet me vështirësi për të mbetur shtatzënë, vlerësimi nga gjinekologu ose specialisti i fertilitetit mund të ndihmojë në përcaktimin e shkakut.
