Shqipëria do ta ndërtojë një stadium të përkohshëm për koncertin e Kanye Westit

Tirana pritet të bëhet epiqendra e muzikës ndërkombëtare më 11 korrik 2026, me një koncert të shumëpritur nga artisti global Kanye West.

Ministri i Kulturës dhe Sportit, Blendi Gonxhja, ka zbuluar sot të tjera detaje në lidhje me eventin e rëndësishëm.

Ai bën me dije se do të ngrihet provizorisht nga organizatorët një stadium në Kashar, pranë rrugës dytësore të atuostradës, i cili do të qëndrojë për disa javë, raporton A2CNN. 

“Për arsye mobiliteti e sigurie e aksesi u zgjodh ky pozicion strategjik! Çdo kosto e ngritjes dhe e eventit është e promotorëve privat të eventit, ndërsa shteti koordinon dhe mbështet me çdo mënyrë tjetër që të garantohet mbarëvajtja”, bën me dije ministri Gonxhja.

Sipas njoftimit zyrtar, koncerti do të jetë një performancë e vetme “one-night-only”, e cila pritet të tërheqë dhjetëra mijëra spektatorë nga vendi dhe jashtë tij.