Laporta përgjigjet rreth spekulimeve që Barça mund të nënshkruajë me Haalandin

Presidenti i Barcelonës, Joan Laporta, i është përgjigjur spekulimeve që klubi i tij mund të përpiqet të nënshkruajë me makinën e golit të Manchester Cityt, Erling Haalandin.

Laporta është pyetur për mundësinë që Barcelona të bëjë një nënshkrim me emër të madh, siç është Haalandi, këtë verë mes spekulimeve që Kylian Mbappe do t’i bashkohet rivalëve të Real Madridit. Presidenti i Barcelonës ishte i lumtur të diskutonte planet e transferimit të klubit të tij dhe të shpjegonte pse klubi nuk ka nevojë të shpenzojë shumë për nënshkrime këtë verë.

Ai tha për “Mundo Deportivo”: “Vetëm se ne nuk e shohim si të nevojshme. Do të ketë disa ndryshime”.

Laporta shtoi se Barcelona mund të bëjë “një ose dy shtesa” në skuadër, por paralajmëroi se një nënshkrim me emër të madh mund të prishë ekipin aktual.

“Nuk e shoh të nevojshme të bëjmë një investim që mund të shtrembërojë atë që po ndërtojmë, që është një ekip i balancuar”, shtoi ai. 

“Vitin e ardhshëm do të kemi përsëri Gavin, i cili jep energji. Pedri dhe Frenkie janë lojtarë të klasit botëror si të gjithë ata që kemi”. /Zëri