Ylli i Milanit pranë largimit, shtatë klube nga Anglia e duan transferimin e tij

E ardhmja e Ruben Loftus-Cheek te Milani mbetet ende e paqartë. Mesfushori anglez mund të largohet nga “Rossonerët” që në afatin kalimtar të janarit, me rikthimin në Premier League si një prej mundësive më të mundshme.

Sipas TEAMtalk, klubi italian tashmë ka nisur kontaktet me disa skuadra angleze për të vlerësuar mundësinë e një transferimi gjatë afatit kalimtar të dimrit.Në situatën e Loftus-Cheek ndikojnë dy faktorë kryesorë: minutat e kufizuara në formacionin e Milanit dhe kontrata e tij, e cila skadon në fund të këtij sezoni. Deri më tani, bisedimet për rinovimin e saj nuk kanë nisur.

Sipas informacioneve të TEAMtalk, ndërmjetësit kanë kontaktuar shtatë klube të Ligës Premier: Tottenham, Newcastle, Everton, Crystal Palace, Nottingham Forest, Sunderland dhe Fulham.

Kjo do t’i hapte Loftus-Cheek mundësinë për t’u rikthyer në Angli pas eksperiencës së tij në Serie A. Mesfushori anglez është pjesë e Milanit prej vitit 2023, pasi iu bashkua klubit nga Chelsea.

Duke qenë se kanë mbetur vetëm gjashtë muaj deri në përfundimin e kontratës së tij, Milani do të ishte i gatshëm ta lejonte largimin e Loftus-Cheek për një shumë relativisht të ulët, që nuk do të kalonte 5 milionë euro.

Kështu, janari mund të jetë momenti kur të dyja palët do të duhet të marrin një vendim për të ardhmen e mesfushorit, veçanërisht nëse minutat e tij në Milano vazhdojnë të jenë të kufizuara./telegrafi