Nëna e Ronaldos: “Ishte një tronditje, edhe qava”
Pas përplasjes mes Cristiano Ronaldos dhe trajnerit të Portugalisë, Jorge Jesus, nëna e yllit portugez, Dolores Aveiro, ka reaguar publikisht për situatën.
Ajo e pranoi se e përjetoi me shumë emocion largimin e djalit të saj nga grumbullimi i kombëtares.
“Jam e trishtuar, është normale. Ishte një tronditje. Djali im mund të kishte dalë nga dera kryesore, por në fund doli nga dera dytësore. Por nuk ka problem, Zoti do të kujdeset për gjithçka”, deklaroi Dolores për "TV 7 Dias".
Nëna e CR7 zbuloi gjithashtu se kishte qarë pas zhvillimeve të fundit: “E pranoj se qava pak, por kjo të ndihmon edhe për të çliruar emocionet.”
Dolores mbrojti fuqishëm djalin e saj dhe kritikoi mënyrën se si, sipas saj, është trajtuar Ronaldo.
“Cristiano ka qenë gjithmonë heroi i Portugalisë. Nuk po e vlerësojnë ashtu siç duhet. Ata nuk i japin vlerën që meriton Cristiano”, u shpreh ajo.
Ajo tregoi edhe për telefonatën e parë me Ronaldon pasi ai u largua nga grumbullimi.
Sipas Dolores, futbollisti i tha të mos shqetësohej dhe se do ta tregonte të vërtetën kur të ishin të gjithë bashkë.
Ronaldo është përplasur me Jorge Jesus pas mosmarrëveshjeve rreth aktivizimit të tij dhe deklaratave të trajnerit.
Kapiteni portugez më pas e publikoi versionin e tij të ngjarjeve, duke folur për një “thyerje absolute të besimit” ndaj trajnerit. /Zëri
