Arsenali fitoi Premierligën, por 60 vende pune janë në rrezik, reagon Arteta

Arsenali po përballet me polemika pas vendimit për të shkurtuar deri në 60 vende pune, vetëm pak ditë pasi trajneri Mikel Arteta nënshkroi kontratën e re me klubin londinez.

Vendimi synon uljen e shpenzimeve dhe vjen pas një analize të brendshme të strukturës së klubit.

Sipas raportimeve, shkurtimet do të prekin kryesisht pozitat jashtë fushës, ndërsa stafi i trajnerëve dhe ai i performancës së ekipeve të para, si te meshkujt, ashtu edhe te femrat, nuk do të preken.

Arteta: Nuk jam personi i duhur për t'iu përgjigjur kësaj pyetjeje

Trajneri spanjoll u pyet për këtë vendim dhe shpjegoi se drejtuesit ia kishin paraqitur arsyetimin e tyre.

“Ma kanë shpjeguar analizën e bërë në të gjithë klubin, me synimin për t’u zhvilluar dhe për t’u përmirësuar vazhdimisht. Duhet të merren disa vendime për t’i vendosur njerëzit në pozitat e duhura dhe për të vazhduar investimet, në mënyrë që të arrijmë objektivat dhe suksesin që dëshirojmë”, deklaroi Arteta.

Ai shtoi se nuk është personi i duhur për t’iu përgjigjur më gjerësisht kësaj çështjeje, duke kërkuar që kjo të respektohet.

Kontrata e re e Artetës i shton polemikat

Koha e këtij vendimi ka nxitur kritika, pasi Arsenali sapo i kishte ofruar Artetës një kontratë të re deri në vitin 2030, me pagë të raportuar mbi 20 milionë euro në sezon.

Klubi kishte regjistruar të hyra rekord prej 691 milionë funtesh për vitin financiar 2024/25, por gjithashtu kishte raportuar humbje prej 1.4 milionë funtesh. Shpenzimet operative ishin rritur ndjeshëm, çka e ka shtyrë klubin të rishikojë strukturën dhe kostot e tij.

Sipas raportimeve, procesi i ristrukturimit kishte nisur para se të zyrtarizohej kontrata e re e trajnerit.