Krasniqi: Në Drenas, fillon rënia e PDK-së (Video)
Kryetari i Këshillit Kombëtarë të Nismës për Kosovën, Jakup Krasniqi në një intervistë në InfoBox, ka thënë se në Drenas, fillon edhe rënia e erës së Partisë Demokratike të Kosovës.
“Unë mendoj që në Drenas, do të ketë ndryshime por si do të zhvillohen gjërat më tej nuk e di. Por, zinxhiri i rënies së Qeverisë së Partisë Demokratike do të ndërpritet. Era e ndryshimeve mendoj që ka ardhur, po niset me Drenasin dhe mendoj që kjo era e ndryshimeve duhet të jetë në gjithë Republikën e Kosovës”, tha ai në RTV Dukagjini.
Duke folur për Rastin Drenica, prej të cilit buruan edhe zgjedhjet e parakohshme në këtë komunë, Krasniqi tha se të dënuarit, është dashtë të dekorohen e jo të dënohen, për atë çfarë kanë bërë gjatë luftës.
Por, ai foli edhe për kreun e partisë së tij, Fatmir Limajn, që tha se ai vazhdimisht po përndiqet politikisht.
Krasniqi foli edhe për Gjykatën Speciale, për të cilën tha se është i gatshëm të përgjigjet në çdo moment, nëse është në listën e të akuzuarve.
Lidhur me rastin e vdekjes së Astrit Deharit, ai i ka bërë përgjegjës krerët e institucioneve përkatëse, përfshirë edhe ministrat përkatës, deri sa ka kërkuar që rasti të mos politizohet.
