Osmani: Masakra e Poklekut, dëshmi e gjenocidit të kryer në Kosovë

Ish-presidentja e Kosovës Vjosa Osmani ka përkujtuar masakrën e Poklekut, për të cilën tha se është dëshmi e gjenocidit të kryer në Kosovë.

Osmani, përmes një postimi në rrjetin social Facebook, ka kujtuar viktimat e kësaj masakre duke potencuar që në këtë gjenocid u vranë kryesisht fëmijë dhe gra.

“Liri Muqolli ishte 6-muajshe kur së bashku me 53 anëtarë të familjes, kryesisht fëmijë e gra, u ekzekutuan, u dogjën njëherë, pastaj u dogjën sërish. Liri kishte emrin, por lirinë nuk e arriti kurrë”, shkroi Osmani.

Postimi i plotë:

Liri Muqolli ishte 6-muajshe kur së bashku me 53 anëtarë të familjes, kryesisht fëmijë e gra, u ekzekutuan, u dogjën njëherë, pastaj u dogjën sërish.

Liri kishte emrin, por lirinë nuk e arriti kurrë.

Kushdo që thotë se në Kosovë nuk është kryer gjenocid, le të shkojë në Poklek e në çdo pjesë të Kosovës. Dëshmitë e holokaustit të kryer në Kosovë janë akoma të freskëta.

Në këtë përvjetor të masakrave në Poklek e Çikatovë, kujtojmë e nuk harrojmë kurrë.

Lavdi e përjetshme të gjithë martirëve të lirisë!